DILI, 26 fevereiru 2024 (TATOLI) – Grupu Haburas Bidaok husi munisípiu Manatuto hetan apoiu finanseiru $3.646 husi Ministériu Agrikultura, Pekuária, Peska no Floresta (MAPPF) hodi kontinua sira-nian atividade akikultura ne’ebé halo ona durante tinan tolu.
Sekretáriu grupu Haburas Bidaok, Fernando Raka Soares, relata katak osan hamutuk rihun $3-resin ne’ebé ministériu disponibiliza ona ba sira foin maka foti $2.500 no verba sira ne’e uza hodi halo tan tanke neen, inklui halo mós manutensaun ba tanke sira, sosa hahán ba ikan no halo perfurasaun ba bee, nune’e labele dependénsia ba bee-mota iha tempu udan.
“Antes ne’e ita iha ona kolam haat ne’ebé ita kria rasik, maibé ho osan rihun $3-resin husi Governu ne’e, ita kria tan tanke neen ne’ebé agora ita iha ona 10”, Fernando Soares hatete ba Tatoli iha Comoro, ohin.
Dirijente grupu ne’e salienta katak tanke ne’ebé sira halo ne’e ninia lokalizasaun iha natár no ikan sira ne’ebé durante ne’e sira haki’ak sosa husi komunidade sira mak hanesan ikan Nila no Emas. Aleinde ne’e, MAPPF mós fó fini ikan Nila hamutuk 2.500.
Ikan sira ne’e agora haki’ak ona iha tanke 10 ne’ebé hadi’a ona. Ikan ne’ebé haki’ak ne’e seidauk kolleta, tanba ne’e seidauk hetan lukru husi ikan sira ne’e.
“Ikan sira ne’ebé maka antes ne’e ami haki’ak ona seidauk kolleta hodi fa’an iha merkadu. Karik fulan ida tan ba oin ami bele kolleta ona hodi fa’an”, nia espera.
Rekorde katak MAPPF disponibiliza ona $49.308 ba grupu 21 hodi haki’ak ikan, nune’e bele hasa’e produsaun ikan no sustenta nesesidade família nian.
Diretór Nasionál Akikultura, Fidelino Sousa Marques, hatete benfisiáriu hamutuk 336, kompostu husi feto 124 no mane 212 ne’ebé mai husi munisípiu Liquiçá rua, Aileu ida, Lautém tolu, Ainaro ida, Baucau rua, Viqueque ida, Manufahi ida, Manatuto rua, Bobonaro haat, Covalima rua no Ermera rua.
“Osan ne’ebé ita apoia ona ba grupu 21 mai husi orsamentu 2023 nian ne’ebé ita prevee ho totál rihun $90. Husi montante osan ne’ebé ita prevee ne’e gasta de’it rihun $49.308, ekivalente ba 60%, hodi apoia ba grupu sira ne’e, maibé metade osan 40% maka la konsege gasta hotu ne’e filafali ba kofre Estadu”, dirijente dehan ba Tatoli iha Comoro, foin lalais ne’e.
Diretór ne’e informa katak, iha 2024, kontinua prevee osan liuhusi tranferénsia públika hamutuk rihun $100. Diresaun sei foti 40% hodi kontinua apoia grupu haki’ak ikan sira ne’ebé eziste hodi bele kontinua sira-nian atividade, maibé nia kritériu mak kada grupu tenke submete uluk sira-nian relatóriu ezekuzasaun husi orsamentu 60% ne’ebé disponibiliza ona ba sira, depois maka ekipa husi diresaun bá halo verifikasaun no bainhira loos ona maka foin apoia tan osan faze daruak ba grupu sira ne’e.
Notísia relevante: Benefisiáriu 300-resin hetan fundu $49.308 hodi haki’ak ikan
Jornalista: Tomé Amado
Editora: Maria Auxiliadora
