Grupu Hadomi Ai-Parapa iha Ulumera kuda ai-parapa iha área ektare hitu
DILI, 12 marsu 2024 (TATOLI) – Grupu Hadomi Ai-Parapa iha suku Ulumera, aldeia Mane Munu, postu administrativu Bazartete, munisípiu Liquiçá, kuda ona ai-parapa rihun 120 iha tasi-ibun Tíbar iha rai ektare hitu.
Xefe grupu Hadomi Ai-Parapa, Veríssimo das Neves, informa katak área tasi-ibun Tíbar nian ho ektares 24 maka tama ona ba planu atu kuda ai-parapa oan no daudaun kuda ona iha área ektare hitu. Atividade kuda ai ne’e sei kontinua to’o atinje númeru ne’ebé iha.
“Ita hala’o atividade kuda ai-parapa ne’e tanba halo ona akordu ho Governu, liuhusi Ministériu Agrikultura, Pekuária, Peska no Floresta iha tinan kotuk atu kuda parapa iha tasi-ninin sira to’o tinan lima”, xefe grupu iha Caicoli, ohin.
Akordu ne’ebé ministériu halo ho grupu ne’e tanba konsidera sira iha ona sentru viveiru atu haki’ak ai-parapa oan hodi prevene espésie sira husi ameasa dezastre naturál no hahalok ema balun nian ne’ebé laiha konsiénsia atu kuidadu ambiente tasi nian.
Veríssimo Neves relata katak fini ai-parapa ne’e sira hahú kuda iha sentru viveiru dezde 2017 hamutuk rihun 250 no husi fini ne’ebé prodús ne’e grupu hahú kuda iha tinan kotuk no sei kuda beibeik to’o tinan lima nia laran.
Akordu ho Ministériu Agrikultura ne’e hetan alokasaun fundu iha tinan kotuk ho montante $4.940. Osan sira ne’e grupu uza ba atividade produsaun no manutensaun.
Diretór-Jerál Floresta, Raimundo Mau, relembra katak, iha 2023, Governu liuhusi Ministériu Agrikultura, Pekuária, Peska no Floresta halo akordu ida ba tinan lima ho grupu haki’ak ai-parapa sira atubele prodús plantasaun ne’e barak liután hodi bele kuda iha tasi-ninin sira, nune’e bele proteje espésie sira iha tasi.
“Akordu ita halo ho grupu sira ne’e ba tinan lima hahú iha tinan kotuk ho totál orsamentu retifikativu rihun $126. Ita-nian grupu sira sei kontinua halo kontrola ba ai-parapa sira ne’ebé mate bele troka fali foun”, Raimundo Mau esplika.
Husi fundu ne’ebé ministériu aloka ba grupu sira ne’e inklui mós verba ba sentru viveiru Tíbar no Ulumera-Liquiçá, Hera no Metinaro-Dili nian. Orsamentu ne’e ministériu apoia atu grupu sira bele uza hodi halo manutensaun ba sentru viveiru sira, inklui sosa ai-moruk hodi rega ba ai-parapa ne’ebé grupu sira haki’ak.
Notísia relevante: SEF hamutuk ho komunidade kuda ai-parapa 1000 iha tasi ibun Metinaro
Jornalista: Tomé Amado
Editora: Maria Auxiliadora
