iklan

COVALIMA

Mota Sebalebo fó ameasa ba komunidade iha tempu udan

Mota Sebalebo fó ameasa ba komunidade iha tempu udan

Mota Sebalebo.

COVALIMA, 12 marsu 2024 (TATOLI)  – Mota Sebalebo iha aldeia Bonuk, postu Suai, sai ameasa bainhira iha tempu udan komunidade sira halo movimentasaun bá-mai toos no estudante sira hakat atu bá eskola, tanba volume bee ne’ebé maka’as.

Xefe suku Labarai, Paulo de Sena, husu atensaun ba populasaun sira tenke kuidadu bainhira bá toos no eskola, tanba mota ne’e bele fó ameasa bá sira atu hakat bá-mai.

“Husu ba komunidade iha tempu udan hanesan ne’e tuur hakmatek iha uma. Aldeia Bonuk fatin ba risku dezastre naturál, tanba mota Sebalebo ameasadu ba komunidade atu hakat bá-mai bainhira bá sira-nian toos, tanba maioria sira halo toos iha mota ninin”, Paulo de Sena apela.

Ho volume mota ne’ebé boot, autoridade lokál ne’e dehan bele estraga mós sira-nian ai-han no mós fó impaktu ba estudante sira atu tuir prosesu aprendizajen.

Iha 2023, Programa Nasionál Dezenvolvimentu Suku (PNDS) halo konstrusaun ba ponte mota Sebalebo ho metru lima ne’ebé foin atinje 50%.

Nune’e, líder lokál serbisu hamutuk ho Ekipa Jestaun Suku (EJS) atu finaliza lalais obra ne’ebé mak PNDS konstrui hodi fasilita populasaun bele halo movimentasaun. Komunidade aldeia Bonuk, suku Labarai, ho nia abitante hamutuk 569 no totál uma-kain 74 .

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!