iklan

COVALIMA, HEADLINE

Notariadu Covalima suspende provizoriamente atendimentu pasaporte ba sidadaun

Notariadu Covalima suspende provizoriamente atendimentu pasaporte ba sidadaun

Pasaporte Repúblika Demokratika Timor-Leste (RDTL). Imajen/Espesiál

COVALIMA, 12 marsu 2024 (TATOLI) – Servisu Konservatóriu Rejistu Notariadu Covalima suspende, semana rua ona, dezde finál fevereiru, atendimentu pasaporte ba sidadaun tanba mákina impresora avaria.

“Ami iha munisípiu fasilita de’it hodi manda dadus ba nasionál mak halo imprime, tanba agora problema ho mákina impresora ba pasaporte”, Diretór interinu Servisu Konservatóriu Rejistu Notariadu Covalima, Fernando da Conceição Araújo, dehan iha Bairru Rompe, ohin.

Fernando Araújo salienta katak, durante ne’e, Notariadu Covalima halo atendimentu ba sidadaun sira ne’ebé maioria trata pasaporte komún, maske bele atende mós pasaporte ba diplomata no traballu nian.

“Iha Notariadu Covalima kada loron halo atendimentu ba sidadaun ne’ebé trata pasaporte na’in- 30 no dala ruma 15 de’it”, dirijente ne’e relata.

Tuir dadus, Notariadu Covalima halo atendimentu pasaporte ba sidadaun hamutuk 305 iha 29 janeiru to’o fevereiru, husi númeru ne’e na’in-ualu trata pasaporte ho durasaun loron tolu ne’ebé selu $75 no soma hamutuk $600, na’in-297 trata pasaporte semana ida nian ho presu $50 no totál osan hamutuk $14.850.

Sidadaun Adriano Gusmão husu Governu atu rezolve problema atendimentu pasaporte, tanba la to’o fulan mákina impresora ba pasaporte avaria ona.

“Agora atendementu pasaporte mak hanesan ne’e hela deit bele impede ami atu bá serbisu iha rai-li’ur hanesan Austrália hn Koreia”, nia lamenta.

Notísia relevante: Aban, Servisu Notariadu Covalima atende sidadaun trata pasaporte komum

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!