Aban, Servisu Notariadu Covalima atende sidadaun trata pasaporte komum
COVALIMA, 21 novembru 2023 (TATOLI)–Diretór Servisu Minisipál Konservatóriu Servisu Rejistu Notariadu Covalima, António Sarmento, hateten bazeia ba orientasaun hosi nasionál katal Servisu Rejistu Notariadu Covalima hahú halo atendimentu ba sidadaun trata pasaporte komum iha kuarta (22 novembru 2023) aban.
Notísia Relevante: Governu aprova empreza fornese kaderneta pasaporte 73.150
“Aban, ami komesa halo atendimentu sidadaun sira trata pasaporte eletrónika ho normál,” António Sarmento hateten ba jornalista iha nia servisu-fatin, Bairru Rompe, tersa ne’e.
Tuir planu, nia dehan, kada loron ida sei atende sidadaun nain-25 ne’ebé mak atu trata sira-nia pasaporte iha Servisu Rejistu Notariadu Covalima.
Servisu rejistu Notariadu Covalima halo atendimentu sidadaun ne’ebé trata pasaporte ho tipu komum, sidadaun ne’ebé atu trata pasaporte ho tipu traballu no diploma, iha munisípiu labele halo atendimentu tanba tenke trata iha nasionál.
Kritéria atu trata pasaporte komum tenke lori dokumentu sira hanesan sidadaun ne’ebé atu renova pasaporte lori pasaporte tuan atu halo renovasaun, ba sidadaun ne’ebé nia pasaporte livru nakonu ne’e lori pasaporte tuan, Bilette Identidade (BI) no Sertidaun RDTL.
Kritéria trata pasaporte ba labarik menór ho idade 12 ne’ebé seidauk iha kartaun eleitorál tenke lori dokumentu hanesan deklarasaun inan-aman, inan-aman nia sertidaun no aprezenta mós inan-aman nia sertidaun RDTL.
Oráriu atendemintu hahú segunda to’o kinta-feira no loron sesta-feira labele halo atendimentu ba sidadaun sira atu trata pasaporte, tanba haree arkivu no halo limpeza jerál iha edifísiu notariadu Covalima.
Jornalista : Celestina Teles
Editór : Cancio Ximenes
