DILI, 27 setembru 2023 (TATOLI)—Governu liuhosi reuniaun Konsellu Ministru (KM) ordinária, kuarta ne’e, delibera ona hodi aprova halo prosedimentu ajuste diretu urjente ho empreza Thales DIS Singapore PTE LTD, hodi fornese unidade kaderneta pasaporte eletróniku (epassport) hamutuk 73.150.
“Proposta ne’e aprezenta hosi Ministru Justisa, Amândio de Sá Benevides, ne’ebé hetan ona aprovasaun,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Notísia relevante : MJ promete rezolve kaderneta pasaporte no blanku BI iha loron 100
Antes ne’e, Governu anteriór deside empreza Visi Mitra no Thales International hosi Finlándia halo produsaun ba kaderneta pasaporte Timor-Leste, ne’ebé konsege rezolve ona prosesu lubuk ida hanesan selebra kontratu no halo pagamentu.
Provizóriamente Governu hakarak simu uluk kaderneta pasaporte 16.000 hodi atende situasaun ne’ebé ema barak presiza urjénsia.
Tanba iha ona akordu entre Governu ho empreza, tanba ne’e responsável garante katak sira sei aselera prosesu no fornese kaderneta.
Orsamentu ne’ebé prevee hodi halo produsaun kaderneta pasaporte ho motante $212.000.
Jornalista : Antónia Gusmão
Editora : Julia Chatarina
