Sekretáriu Jerál ASEAN sei vizita Timor-Leste iha 01 abríl
DILI, 12 marsu 2024 (TATOLI)—Sekretáriu Jerál hosi Asosiasaun Nasaun Sudeste Asiátiku (ASEAN, siglá inglés), Kao Kim Hourn, sei vizita Timor-Leste iha loron 01 fulan-abríl tinan 1024.
Notísia Relevante: PR Horta otimista Timor-Leste sei adere ba ASEAN
Vise Ministra Negósiu Estranjeiru no Kooperasaun (MNEK) ba asuntu Asosiasaun Nasaun Sudeste Asiátiku (ASEAN), Milena Rangel, atualiza ajenda importante ne’e ba Prezidente Parlamentu Nasionál, Maria Fernanda Lay.
“Ohin, mai hasoru Prezidente atu informa de’it vizita Sekretáriu Jerál ASEAN mai Timor-Leste durante loron tolu hahú hosi 01-03 abríl tinan ne’e, tanba sei iha programa ida Sekretáriu Jerál ASEAN sei hasoru malu ho Prezidente PN,” Vise Ministra ne’e hateten ba Agência Tatoli hafoin ramata enkontru ho Prezidente PN iha sala konferénsia PN, tersa ne’e.
Nia hatutan, ida-ne’e vizita normál ba nasaun kandidatu atu tama ona membru ne’ebé Sekretáriu Jerál hakarak mós mai vizita antes Timor-Leste sai membru plenu ne’e atu akontese.
Iha vizita kortejia ida-ne’e, nia seo mai haree mós kna’ar hosi PN, Governu, Prezidénsia no mós hosi parte setór privadu sira.
Durante vizita, Sekretáriu Jerál ASEAN sei hasoru entidade importante sira iha nasaun ne’e hanesan Prezidente Repúblika, Prezidente PN ho entidade sira seluk.
Jornalista : Nelson de Sousa
Editór : Cancio Ximenes
