DILI, 08 jullu 2022 (TATOLI)—Prezidente Repúblika (PR), José Ramos Horta, otimista Timor-Leste sei sai membru ka adere ba Association of Southeast Asian Nations (ASEAN).
Notísia Relevante: Aban, ekipa delegasaun “Fact Finding Mission” ASEAN avalia sósiu-kulturál
“Agora ekipa ‘Fact Finding Mission’ halo avaliasaun ne’e ba pilár sósiu no kultura depois misaun ida tan mai asesment ne’ebé halo ba Timor-Leste. Ida-ne’e dala barak ona ha’u partisipa. Uluk sira mai hala’o enkontru ko’alia ho sira depois iha enkontru ASEAN Rejional Forum eventu boot ida iha Dili. Lidér boot sira iha ASEAN hatene ona Timor-Leste nia preparasaun di’ak no esforsu makaas. Ha’u otomista ita bele tama ASEAN,” PR Horta hateten ba jornalista sira hafoin partisipa serimónia The Asean Socio-Cultural Community (ASCC) Fact-Finding Mission to Timor-Leste iha edifísiu Ministéiru Negósiu Estranjeiru no Kooperasaun (MNEK), Avenida Portugál (anterior=Praia dos Coqueiros), Dili, sesta ne’e.
Xefe Estadu espera, iha Indonézia nia mandatu sira iha 2023 bele halo desizaun ida ka agora durante Kambodia nia mandatu deside bainhira mak Timor-Leste bele tama tenke iha informasaun klaru hosi lideransa ASEAN atu tama bainhira.
“Ha’u otimista Timor-Leste sei tama ASEAN. Maibé tama ka la tama Timor-Leste kontinua servisu nafatin, iha relasaun barak iha mundu ho rejiaun ita-nian,” nia dehan.
Nune’e, durante nia mandatu iha tinan lima sei buka hametin liután relasaun ho nasaun sira iha mundu inklui halo diplomásia no nasaun membru ASEAN hodi lori Timor-Leste sai membru.
“Ha’u mós sei buka hametin, aumenta relasaun ho Xina, Korea do Sul, Japaun, Amérika, Austrália. Relasaun Timor-Leste nia interese ho rai sira-ne’e tantu ASEAN importante maibé rai sira seluk ne’e mós importante,” nia hateten.
Jornalista : Nelson de Sousa
Editór : Cancio Ximenes
