DILI, 13 marsu 2024 (TATOLI)– Ministru Juventude Desportu Arte no Kultura (MJDAK), Nelyo Isaac Sarmento, informa, iha loron 16 abríl, ekipa komisaun ba jogu Komunidade Ko’alia Lian Portugés (CPLP-sigla portugés) mai iha Timor-Leste hodi observa kondisaun Timor-Leste nian, molok realiza jogu iha jullu 2025.
“16 abríl ekipa ida hosi CPLP sei mai haree kondisaun ita nian, hanesan Otél nia kondisaun, kampu futeból sira mak sira foin bele fó mak sira foin fó avaliasaun,” Ministru Nelyo katak ba Agência TATOLI iha Palásiu Governu Dili, kuarta ne’e.
Notísia relevante:Nasaun membru CPLP fó votu unaminiade ba TL sai uma-na’in jogu CPLP 2025
Timor-Leste sai uma-nain ba jogu CPLP iha 2025 deside liuhosi konferénsia Ministériu Juventude no Desportu ba dala XIV CPLP, iha Luanda, hosi nasaun hamutuk sia aprova ho votu unaminidade.
Daudaun ne’e, Governu hahú prepara ona kondisaun liuliu Otél sira iha Dili laran, kampu ba jogu sira tantu Dili no Munisípiu.
“Neste momentu ita halo ona preparasaun, maibé ekipa tékniku CPLP sei halo survey kona-bá Otél ne’e merese para ema hela ka la’e, hahán ba ema mai atu han ne’e, kondisaun ínternet sira ne’e oinsa, inklui mós kampu. Iha Konsellu Ministru ami ko’alia kona-bá ne’e ha’u aprezenta buat lubuk ida ba Sekretáriu Ezekutivu CPLP ne’ebé abríl sira mai mak ita haree,” nia tenik.
Nia esplika, bainhira ekipa tékniku halo ona survey mak foin foti desizaun ba kondisaun Timor-Leste nian bele ka la’e realiza jogu CPLP ne’ebé sei akomula nasaun hamutuk sia ne’ebé sai membru permanente ba CPLP.
“Ekipa ne’e mai haree tia lai mak sira foin bele foti desizaun jogu ne’e bele realiza ka lae, ou sira keta orienta tan ita hadi’a tan buat balun karik, depois mak ita haree. Orsamentu ba jogu ne’e ita seidauk hatene tanba orsamentu tama ba iha tinan 2025 nian,” Governante ne’e afirma
Zacarias garante TL sai uma-nain
Entretantu, Sekretáriu Ezekutivu CPLP, Zacarias Albano da Costa, garante katak jogu CPLP realiza duni iha Timor-Leste iha tinan oin.
“Ita haree agora Governu Timor-Leste halo preparasaun hela, jullu tinan oin jogu CPLP sei realiza iha Timor-Leste. Ekipa sira sei mai haree kondisaun Timor nian maibé jogu sei hala’o iha Timor-Leste,” hatete Zacarias.
Jogu modalidade sia
Rekorda fali katak, CPLP liuhosi konferénsia Ministériu Juventude no Desportu ba dala XIV, iha Luanda, hosi nasaun hamutuk sia aprova ho votu unaminidade ba proposta Timor-Leste nian ne’ebé husu atu sai uma-nain ba jogu CPLP iha 2025.
Kandidatura Timor-Leste nian hodi sai uma-na’in ne’e aprezenta direta hosi Ministru MJDAK Nelyo lsaac Sarmento no hetan votu unamidade hosi Nasaun membru sira hanesan Angola, Brazil, Cabo Verde, Guinne-Bissau, Guinne Equtorial, Mosambique, São Tome e Principe no Portugal.
Hafoin deklara kandidatura, Diretor Nasional Desportu MJDAK, Cesarino da Silva halo kedan aprezentasaun ba preparasaun téknika Timor- Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból , Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.
Jogu CPLP ne’e sei implementa iha loron 17-27 Jullu tinan 2025 ne’ebé sei kompete entre nasaun CPLP hotu.
Ho nune’e, Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.
Notísia relevante:TL prepara ba uma-nain jogu CPLP no kompete sea Games Thailandia iha 2025
Jornalista: Hortencio Sanchez
Editór : Florencio Miranda Ximenes
