DILI, 13 marsu 2024 (TATOLI)–Empreza australiana MADEC fó teste ba kandidatu traballadór Austrália hamutuk na’in-480, iha kuarta ne’e.
Teste ne’e loke hosi Sekretáriu Estadu Formasaun Profisionál no Empregu, Rogério de Araújo Mendonça, ne’ebé partisipa mós hosi Primeira Sekretária Embaixadora Austrália, Penny.
Sekretáriu Estadu Rogério de Araújo Mendonça, apresia ba disponibilidade empreza ne’ebé apoia ona Timor-Leste hodi fó oportunidade ba timor-oan sira bá serbisu iha Austrália hodi hadi’a ekonomia família no rai-laran.
“Agradese ba empreza MADEC, ho esforsu tomak bele ajuda Estadu Timor-Leste hodi haruka ami-nia joven sira bá serbisu iha ne’ebá liuhosi apoia ne’e bele rezolve ekonomia família,” governante hato’o agradesimentu ne’e bainhira halo abertura ba teste, iha Otel Novo Turismo.
Notísia relevante : SEFOPE realiza ona teste lian inglés ba kandidatu traballadór iha munisípiu hitu
Ekipa responsável resliza teste ne’e ho objetivu atu empreza rasik bele sukat kapasidade, abilidade no haree komportamentu kandidatu traballadór sira.
Sekretáriu Estadu dehan, kooperasaun ne’e entre Governu ho Governu, tanba ne’e bainhira traballadór sira hasoru problema ruma bele hakbesik-an ba Adidu Traballu ka Asistente Adidu hodi buka solusaun.
Totál traballadór ne’ebé tuir teste hamutuk 480, enkuantu empreza MADEC presiza na’in-400, nune’e traballadór 80 sei rejista iha sistema bainhira empreza presiza bele bolu maibé sei tuir hikas teste.
Antes ne’e, MADEC emprega ona timor-oan hamutuk na’in-1.500 iha área serbisu oin-oin.
Jornalista : Antónia Gusmão
Editora : Julia Chatarina
