DILI, 13 marsu 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Ministru Prezidénsia Konsellu Ministru, Agio Pereira, kona-ba rejime espesiál aprovizionamentu ligadu ho vizita Sua Santidade Papa, ne’ebé tuir planu sei vizita Timor iha tinan ne’e.
Inisiativa ne’e tanba Governu konsidera vizita Santo Papa marka istória no signifikadu ba populasaun timor-oan.
“Diploma ida-ne’e ho objetivu atu asegura prosedimentu espesiál ne’ebé vigora ba kontratasaun públika hodi aluga ka akizisaun bens móveis, akizisaun servisu ka realizasaun kontrata obra públika ne’ebé ho intensaun ba organizasaun, programasaun, konsesaun no implementasaun atividade no projetu sira hodi garante seguransa no organizasaun ba vizita Santo Papa,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : Governu hadi’a infraestrutura simu Papa Francisco nu’udar obra permanente ba povu
Diploma ne’e atu responde ba nesesidade hodi formaliza no fó prazu ne’ebé la tuir karater urjente preparativu, ne’ebé tenke implementa ba vizita Santo Papa.
Antes ne’e, Governu liuhosi reuniaun ezekutivu delibera atu autoriza despeza to’o montante millaun $12, ne’ebé Governu foti hosi Fundu Kontinjénsia ba Komisaun Altu Nível Institusionál ba vizita Sua Santidade Papa Francisco hodi organiza atividade preparasaun ba vizita Santo Papa.
Jornalista : Antónia Gusmão
Editora : Julia Chatarina
