DILI, 13 marsu 2024 (TATOLI)–Ministru Obra Públika, Samuel Marçal, aprezenta proposta ida, iha reuniaun ordinária Konsellu Ministru (KM), kuarta ne’e, hodi autoriza despeza ba transferénsia fundu Orsamentu Jerál Estadu hosi programa ‘802 Eletrisidade’ hosi Ministériu Obra Públika (MOP) ba Eletricidade de Timor-Leste, Empreza Públika (EDTL, E.P).
“Konsellu Ministru delibera hodi autoriza despeza ba selebrasaun kontratu subvensaun entre MOP no EDTL, E.P ho valór millaun $148,5, ne’ebé serve atu halo dotasaun ba EDTL, E.P rekursu sira ne’ebé presiza hodi halo fornesimentu enerjia elétrika iha territóriu nasionál, servisu públiku esensiál ba populasaun no ba ekonomia país nian,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : EDTL tinan ne’e deklara territóriu Timor-Leste asesu hotu ona enerjia eletrisidade
Antes ne’e, Governu deside Timor Gás no Petróleu, Empreza Públika (Timor GAP, E.P) selebra kontratu ho EDTL, E.P hodi fornese kombustível ba sentrál elétrika Betano iha lote tolu, enkuantu sentrál elétrika Hera fornese hosi Esperansa Timor-oan (ETO).
Jornalista : Antónia Gusmão
Editora : Julia Chatarina
