iklan

EKONOMIA, MUNISÍPIU, VIQUEQUE

MAPPF Viqueque kuda tan hare nakroma iha natar ektare 200

MAPPF Viqueque kuda tan hare nakroma iha natar ektare 200

MAPPF Viqueque Kuda tan hare nakroma ektare 200. Imajén Tatoli/Vitorino Lopes da Costa

VIQUEQUE, 13 marsu 2024 (TATOLI)— Diretór Servisu Agrikultura iha Ministériu Agrikultura, Peska, Pekuária no Floresta (MAPPF) munisípiu Viqueque, Juaquim Fernandes, informa, kuda tan hare ho varidade nakroma ba ektare 200 iha postu administrativu Uatulari, munisípiu Viqueque.

“Iha tinan ne’e, ami halo espasaun ba hare ho varidade nakroman ba ektare 200, nune’e daudaun ne’e prepara ona hodi utiliza adubu orgánika nasa, super nasa no hormonic (POC) ne’ebé kuda iha irrigasaun Bebui postu Uatulari”, Diretór Joaquin, hateten ba Agência TATOLI,I.P, iha resintu administasaun Viqueque, ohin.

Objetivu ba espasaun hare refere atu hasa’e produsaun hare rai laran tanba MAPPF mós prepara ai-moruk hodi uza ba natar liuliu adubu orgánika.

Tuir dadus iha tinan 2023, MAPPF Viqueque utiliza adubu orgánika iha  irrigasaun Bebui ho pakote ida hodi kuda hare variedade nakroma hamutuk ektare 160 no  kada ektare ida ho rezulta tonelada lima, nune’e husi ektare 160 totál produsaun   tonelada 800.

“Tanba ne’e, iha tinan ida-ne’e ami hakarak halo espasaun ba ektare 200 ho ami-nia tarjetu ba tinan  ida ne’e bele atinje ba tonelada 1.000 tanba kada ektare ida sei atinje produsaun tonelada lima”, nia espera.

Enkuantu, Servisu Agrikultura munisípiu Viqueque halo ona distribui hare fini ho variedade nakroma hamutuk tonelada neen ba povu agrikutór iha postu Uatulari.

Hadi’a irrigasaun iha postu Lacluta

Entretantu, Reprezenta Autoridade postu Lacluta atuál Xefe Suku Dilór, Jacinto Ximenes, husu Governu liuhosi Ministériu Agrikultura, Peska, Pekuária no Floresta (MAPPF) hadi’a irrigasaun haat ne’ebé kanaliza bee ba natar ektare 185 ne’ebé lokaliza iha suku Dilór, postu administrativu Lacluta, munisípiu Viqueque tanba  abandona kuaze tinan 19.

“Natar partensia suku Dilór ne’e iha fatin haat maka abandonadu tanba kondisaun irrigasaun. Tanba ne’e, ami hakarak husu ba MAPPF atubele hadi’a irrigasaun sira-ne’e hodi povu agrikultór sira bele halo fila fali sira-nia natar no bele hasa’e produsaun rai-laran, atu labele depedente ba ai-han importasaun sira”, autoridade lokál ne’e sujere.

Atu hasa’e produsaun hare MAPPF tenke halo levantamentu ba irrigasaun sira-ne’ebé kondisaun  aat hodi tau ba Orsamentu Jerál Estadu (OJE) hodi bele hadi’a irrigasaun sira.

Tuir dadús hahú tinan 2015 to’o agora natar sira-ne’ebé abandona mak hanesan natar Hae-Talas ektare 45, natar We-Reka ektare 25, natar Tahukmer ektare 15 no natár Lafua ektare 100.

“Natar sira-ne’e iha tempu uluk irrigasaun sei di’ak ne’e ita-nia agrikultór sira halo no iha rezultadu produsaun hare ne’ebé di’ak, maibé daudaun ne’e parte Lafua ne’e balun maka agrikultór sira sei halo tanba agrikultór sira mak inisiativa kee rasik irrigasaun hodi liga ba natar”, nia afirma.

Tuir dadús demografia iha tinan 2022, postu Lacluta iha suku haat kompostu hosi suku Dilor, Uma Tolu, Ahic, no Laline ho totál aldeia 20 no totál  populasaun hamutuk  8.123 ho totál uma-kain 1.907.

MAPPF sei tau prioridade hadi’a irrigasaun

Hatan ba preokupasaun hirak ne’e, Diretór Servisu Agrikultur Munisípiu Viqueque, Joaquim Fernandes, haktuir MAPPF sei tau períoridade ba irrigasaun sira-ne’ebé aat, maibé limitasaun ekipamentu tanba ne’e maka irrigasaun sira iha postu Lacluta seidauk hadi’a.

“Ministériu tau perioridade ba irrigasaun sira-ne’e, maibé limitasaun ba ekipamentu, tanba ne’e agora seidauk bele hadi’a. Irrigasaun sira iha postu Lacluta ami relata hotu ona nasionál ne’ebé ita hein de’it tempu ruma sei hadi’a hodi agrikultór sira halo fila fali sira-nia natar ne’ebé abandona”. Tenik nia.

Notísia relevante: MAPPF prevee millaun $5-resin konstrui irrigasaun iha Baucau-Bobonaro-Viqueque

Jornalista : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!