DILI, 13 marsu 2024 (TATOLI) – Ministériu Agrikultura, Pekuária, Peska no Floresta (MAPPF) koloka ona guarda florestál na’in-haat iha postu administrativu Tutuala hodi halo serbisu ba protesaun ba Bibi-Rusa sira iha illa Jaco.
Diretór Nasionál Konservasaun Floresta, Pedro Pinto, relata katak, tinan ida ne’e, ministériu iha verba rihun $130 atu apoia ba konservasaun florestál, inklui atu ptroteje Rusa sira iha illa Jaco hodi antesipa risku ba hamalaha no hamrook iha tempu bailoro.
“Iha illa Timór ne’e kuaze Rusa iha hotu, maibé iha Jaco maka ninia produsaun ne’e barak liu, entaun ita mós tau ona guarda na’in-haat iha Tutuala hodi tau-matan ba ita-nian Rusa sira”, dirijente ne’e dehan iha Caicoli, ohin.
Antes ne’e, iha ona guarda florestál na’in-tolu maka ministériu koloka iha ne’ebá hodi haree ba serbisu ein jerál floresta nian, maibé ba guarda na’in-haat ne’e serbisu de’it ba protesaun Rusa sira.
Guarda sira ne’e sei serbisu hamutuk ho komunidade Tutuala atu apoia ai-han no bee ba Rusa sira iha Jaco. Sira hamutuk ho autoridade sira inklui populasaun Tutuala maka halo jestaun oinsá atu fó ai-han no bee ba Rusa sira bainhira hetan ameasa.
“Ita apoia ona bero tolu, inklui mina ba tinan ida nian atu transporta hahán no bee bá Rusa sira. Sira sei halo kontolu bá Jaco hodi akompaña dezenvolvimentu Rusa sira-nian karik iha problema ho hahán no bee sira bele distribui kedan”, esplika.
Ho kondisaun ne’ebé Governu kria ona atu proteje Rusa sira labele hetan amesa hanesan iha tinan hirak bá kotuk maka daudaun ne’e iha ona armazein hahán ba Rusa sira, inklui tanke bee ne’ebé monta ona iha Tutuala.
Pedro Pinto salienta katak ho kolokasaun guarda sira ne’e bele fasilita Rusa iha Jaco atu prevene nia númeru mate ne’e labele barak liu hanesan akontese iha tinan sira liu ona. Ministériu preokupa tanba Rusa ne’ebé moris iha Jaco no iha territoriu ne’e orijen Timór nian no bele sai atrasaun turístika ida atu dada vizitante sira bá iha Tutuala no Jaco.
“Ita-nian Rusa sira moris iha Jaco tanba illa ne’e haketak aan husi rai-maran, depois ita-nian komunidade atu asesu bá fatin refere mós limitadu entaun produtividade ba Rusa sira atu moris hodi kria tan jerasaun foun ne’e livre loos”, nia hatete.
Tuir Pedro Pinto, abitante sira iha Tutuala mós barak mak iha ona konsiénsia katak prezensa Rusa nian sai mós alternativu ida ba sira-nian moris, katak turista lokál no internasionál sira bá pasa feria iha Tutuala sei fó mós lukru ba sira tanba sei bá vizita mós fatin turistiku sira, inklui hakarak haree mós Rusa.
Notísia relevante: Governu sei instala bee hosi Valusere ba Illa Jaco
Jornalista: Tomé Amado
Editora: Maria Auxiliadora
