DILI, 13 marsu 2024 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu proposta rezolusaun ba Parlamentu Nasionál, ne’ebé aprezenta hosi Primeiru-Ministru (PM), Kay Rala Xanana Gusmão.
“Diploma ne’e kona-ba ratifikasaun adezaun ba konvensaun hodi hetan solusaun pasífika ba konflitu internasionál, ne’ebé konklui ona iha Haia, iha loron 18 outubru 1907,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Konvensaun ne’e estabelese iha loron 29 jullu 1899 no tuirmai revee iha tinan 1907, hanesan tratadu internasionál ida ho intensaun atu estabelese diretrís no mekanizmu ba rezolusaun disputa entre país sira ho forma pasífika, ho objetivu atu promove pás no seguransa internasionál, prevene konflitu armadu no buka solusaun konsensuál ba diverjénsia entre nasaun sira.
Notísia relevante : PN ratifika konvensaun alterasaun klimátika
Aleinde ne’e, reafirma kompromisu nasionál hodi rezolve diferensa no konflitu ho forma pasífika, ho adezaun ba konvensaun ida-ne’e, Timor-Leste hola parte iha selebrasaun aniversáriu Tribunál Permanente Arbitrajen nian ba da-125, ne’ebé konvensaun 1899 ne’e estabelese ona ho intensaun atu kontribui ba pás jerál no solusaun amigável ba konflitu internasionál.
Tribunál Permanente Arbitrajen dezempeña papél importante ida iha Timor-Leste nia istória, ne’ebé funsiona hanesan rejistu ba konsiliasaun obrigatória entre Timor-Leste no Austrália, iha kontestu konvensaun Nasaun Unida kona-ba Direitu Tasi, ne’ebé lori to’o ba asina tratadu entre Repúblika Demokrátika Timor-Leste no Austrália iha tinan 2019, no estabelese fronteira marrítima iha Tasi Timor.
Timor-Leste hanesan membru sei bele sai país uma-na’in iha Tribunál Permanente Arbitrajen.
Jornalista : Antónia Gusmão
Editora : Julia Chatarina
