COVALIMA, 13 marsu 2024 (TATOLI) – Servisu Munisipál Protesaun Sivíl no Jestaun Risku ba Dezastre Naturál (SMJRDN) Covalima husu ba populasaun atu hamoos valeta, nune’e bele prevene inundasaun.
“Iha ita-nian suku no aldeia ne’ebé risku ba dezastre naturál ita rasik tenke hamoos valeta iha ita-nian uma oin, nune’e tempu udan bee labele intupidu hodi hamosu inundasaun”, Diretór SMJRDN, João Martins, apela ba komunidade, ohin.
Atu halo prevensaun no mitigasaun ba dezastre naturál maka sei kria oráriu hodi vizita suku sira ne’ebé mak risku ba dezastre naturál mak hanesan Suai Loro, Matai no suku ualu iha Zumalai hodi forma grupu komunitáriu atu hamoos valeta.
Relasiona ho udan-boot ne’ebé tau loron hirak ne’e kauza dezastre hanesan anin sobu uma iha suku Dato-Tolu ne’ebé mak fó ona apoiu emerjénsia sira hanesan foos, mina, supermie, sardiña no tasu, sanan, kapa, balde no seluk tan.
Aleinde ne’e, iha vítima ne’ebé anin sobu nia uma iha aldeia Busakukun, suku Debos, postu Suai, ne’ebé mak seidauk hetan apoi emerjénsia no daudaun ne’e Protesaun Sivíl prepara hela atu fó tulun.
Abitante Carlos Amaral konkorda ho avizu husi Protesaun Sivíl atu hamoos valeta, tanba agora tempu udan nune’e bele halo prevensaun ba inundasaun.
“Ita hatene kada tinan bainhira tempu udan sempre akontese dazastre naturál ho tipu inundasaun, entaun atu halo prevensaun, ida-idak iha konsiénsia hodi hamoos rasik valeta iha ida-idak nia uma oin”, nia reforsa.
Tuir dadus Autoridade Protesaun Sivíl Covalima, rejista vítima dezastre naturál hamutuk 98, ne’ebé mak hetan ona apoiu emerjénsia ai-han no la’ós ai-han. Husi númeru ne’e uma-kain 88 mak sei halo prosesu atu bele hetan materiál barekuperasaun uma no osan ba mao de obra.
Tipu dezastre ne’ebé akontese iha fulan-janeiru ho fevereiru hanesan ahi han uma ualu no anin sobu uma- 90 ho nivel estragu aat totál 41, naton ualu no kmaan 39.
Notísia relevante: Komunidade bele informa ba APC atu tesi ai-hun boot besik uma
Jornalista: Celestina Teles
Editora: Maria Auxiliadora
