DILI, 13 marsu 2024 (TATOLI) – Sekretáriu Ezekutivu Nasaun Ko’alia Lian Portugés (CPLP-sigla portugés), Zacarias Albano da Costa, kuarta ne’e, relata servisu hotu ne’ebé durante ne’e halo no rona mós hanoin balun ba Prezidente Repúblika (PR), José Ramos Horta.
“Ha’u mai atualiza ba Prezidente Repúblika kona-bá servisu ne’ebé durante ne’e ami halo CPLP nian, aprezenta mós kalendariu ne’ebé São Tome e Prinsipe hanesan Prezidensiál aprova ona indikativu ba reuniaun nivél altu CPLP nian,” Zacarias tenik ba jornalista sira iha Palásiu Prezidensiál Dili, kuarta ne’e.
Alende ne’e, Sekretáriu Ezekutivu ne’e atualiza mós ba Prezidente Repúblika kona-bá reuniaun Ministru Negósiu Estranjeiru CPLP nian no mós reuniaun G20 nian ne’ebé daudaun ne’e hala’o iha Rio de Janeiro Brazíl.
“Ha’u mai ne’e tanba konvite hosi Prezidente Repúblika no Primeiru Ministru atu mai atualiza servisu sira ne’e, tanba Governu agora foun. Mai ne’e ami ko’alia mós kona-bá oinsá Timor-Leste prontu ona atu simu kna’ar Prezidente ba CPLP iha tinan 2027,” nia tenik.
Tuir nia, Xefe Estadu koñese di’ak servisu CPLP nian. Tanba ne’e Prezidente Repúblika fó apoiu tomak ba ekipa ne’ebé nia parte lidera hodi hala’o servisu másimu liután.
“Prezidente Repúblika koñese di’ak servisu CPLP nian, nia fó apoiu tomak, agora iha momentu ida ne’ebé Timor-Leste atu adere ba ASEAN nasaun membru sira fó sira nia apoia másimu ba Timor-Leste atu adere lalais ba ASEAN,” katak.
CPLP la’os de’it nasaun ne’ebé ko’alia lian portugés, maibé CPLP iha kooperasaun di’ak ho nasaun hotu, konsentrasaun diplomatika, kooperasaun ekonómiku no seluk tan.
CPLP kompostu hosi nasaun membru hamutuk sia mak hanesan Portugál, Brazil, Angola, Mocambique, Cabo-Verde, São Tome e Príncipe, Guinea Bissau, Guinea Equatorial no Timor Leste.
Notísia relevante: Reuniaun konsellu diretór Alfándega CPLP hametin liután lasu amizade
Jornalista: Hortencio Sanchez
Editór : Florencio Miranda Ximenes
