DILI, 13 marsu 2024 (TATOLI)—Sektretáriu Ezekutivu Komunidade Nasaun ho Lian Portugés (CPLP, sigla portugés), Zacarias Albano da Costa halo aprezentasaun kona-ba potensialidade organizasaun, iha ámbitu reuniaun Konsellu Ministru (KM) ordinária, kuarta ne’e.
“Durante aprezentasaun Sekretáriu Ezekutivu ko’alia kona-ba istória fundasaun CPLP no entrada Timor-Leste hanesan membru, misaun, prinsípiu fundamentál no estrutura orgánika ne’ebé kompoin CPLP,” refere nota ne’ebé Agência Tatoli asesu, hafoin reuniaun ezekutivu ne’e, iha Palásiu Governu.
Zacarias da Costa destaka mós espasu integrasaun ekonómika rejionál ne’ebé abranje Estadu membru organizasaun no mensiona instrumentu operasionál sira ne’ebé utiliza.
Notísia relevante : Zacarias Albano atualiza servisu Sekretáriu Ezekutivu CPLP ba Xefe Estadu
Sektretáriu Ezekutivu relata, Timor-Leste adere ba organizasaun durante tinan 23 ona no utiliza rekursu disponível limitadu iha komunidade ne’e.
Nia garante CPLP bele hasa’e kapasidade intervensaun internasionál Timor-Leste liuhosi diplomasia polítika, nune’e mós promove kooperasaun ekonómika no emprezariál, la’ós de’it entre Estadu membru sira maibé mós iha mekanizmu integrasaun ekonomia rejionál.
Ho hanoin ida-ne’e, Sekretáriu Ezekutivu CPLP hateten presiza reforsu signifikativu ne’ebé komplementár iha planu polítiku no finanseiru hodi permite Timor-Leste esplora ninia potensiál hanesan membru.
Jornalista : Antónia Gusmão
Editora : Julia Chatarina
