DILI, 14 marsu 2024 (TATOLI) – Grupu Horta iha suku Fahiria, iha Aileu, simu rihun $2 husi Ministériu Agrikultura, Pekuária, Peska no Floresta hodi reforsa atividade ortikultura.
Responsavel grupu Horta, Mario da Conceição, hatete sira iha rai ektare haat mak daudaun utiliza hodi kuda repollu, modo-metan no mutin, fehuk-roupa no senoura. Modo sira ne’e kuandu to’o tempu kolleta, balun bá fa’an iha merkadu Aileu no barak liu mak bá hatama iha supermerkadu sira iha Dili hanesan Lita Store no fa’an iha merkadu Taibessi.
“Ami-nian atividade kuda modo ne’e foin hahú iha tinan kotuk, maibé tinan ida ne’e maka ami foin hatama pedidu hodi husu apoiu ba ministériu no ami hetan fundu rihun $2 hodi aselera ami-ninia atividade kuda modo ne’e”, dehan Mario da Conceição hatete ba Tatoli iha Comoro, ohin.
Nia esplika katak osan ne’ebé sira hetan husi Diresaun Nasionál Ortikultura la fó direta, maibé sei transfere iha sira-nian konta bankária no fulan tolu tenke relata nia progresu liuhusi atividade kuda modo, nune’e ba futuru sira nafatin hetan apoiu husi ministeriu.
Osan sira ne’e sei uza hodi sosa ai-moruk rega modo nian, inklui halo manutensaun fatin no sosa ekipamentu sira. “Iha tinan kotuk ami susar uitoan, tanba ami-nian fundu lasufisiente, maibé agora bele ona tanba ami hetan ona apoiu husi ministériu”, nia relata.
Modo sira ne’e kuandu kolleta sei fa’an butuk de’it katak modo-mutin no metan futun boot ida $15 dolar, repollu karón ida $10, senoura no fehuk-roupa balde ida $10.
Tékniku husi Diresaun Ortikultura, Francisco da Costa, hatete, durante ne’e, sira fó apoia ba grupu ortikultura sira iha munisípiu atu kontinua sira-nian atividade. Tulun ne’ebé hetan, primeiru, tenke halo uluk identifikadaun fatin sira ne’e no halo lutu nune’e bele asegura husi animál sira.
“Ba grupu Horta husi Aileu-Fahiria nian ne’e molok ita apoia fundu ba sira, ita bá survey uluk sira-nian fatin no ita haree katak sira iha duni rai eKtares haat ne’ebé sira kuda modo ne’e iha duni kondisaun ne’ébé seguru husi animál”, esplika.
Jornalista: Tomé Amado
Editora: Maria Auxiliadora
