DILI, 01 Maiu 2026 (TATOLI)—Konfederasaun Sindikatu Timor-Leste (KSTL, sigla portugés), realiza marsa hodi komemora Loron Mundiál Traballadór ho tema “Dignifika traballadór nu’udar eroi foun ba dezenvolvimentu nasaun: Promove traballu dignu prosperiedade no justisa sosiál”.
Notísia Relevante: Hadau tempu ba eskola, haknauk osan liuhusi servisu iha loja
KSTL hamutuk ho traballadór sira hotu hala’o marsa (long mars) ne’e husi sede KSTL Bemori to’o Palásiu Governu nia oin, atu organizasaun sindikatu no traballadór sira hotu ezerse sira-nia liberdade, hato’o sira-nia esperansa no obstákulu durante iha servisu fatin.
Prezidente Konfederasaun Sindimatu Timor-Leste (KSTL), Almerio Vila Nova, husu Governu hodi konsidera no fó importánsia ba problema laborál ne’ebé mak durante ne’e akontese iha Timor-Leste hanesan saláriu mínimu no seguransa sosiál ba traballadór sira.
“Entaun atividade marsa ne’e sai simboliza ne’ebé ami sempre halo kada tinan, hodi hatudu nafatin traballadór nia luta ba públiku, tanba durante ne’e ladun iha liberdade ba traballadór nia nesesidade,” Prezidente KSTL ne’e informa ba jornalista sira iha sede KSTL, Bemori, ohin.
Tamba ne’e, nia husu ba Governu atu aselera lalais ezbosu lei kona-ba saláriu mínimu ba traballadór sira-ne’ebé kontinua afeta ba ekonomia família liuliu sira-nia rendimentu ne’ebé ladun sustentavel ba sira-nia moris.
“Ami konsidera katak saláriu mínimu ba travalladór sira hasa’e ba $154 ne’e moderadu ka la balansu ho inflasaun ne’ebé akontese kada tinan. Saláriu justu ne’e ho montante $200 ba leten. Montante ne’ebé Governu define la nesesáriu tanba osan sira-ne’e sirkula iha rai laran, la’ós ba investe iha rai-li’ur,” nia hateten.
KSTL kontinua hamri’ik hodi luta ba direitu traballadór nian, karik ezbosu lei ne’e seidauk aprova sira kontinua halo ezijénsia ba públiku la presiza hein to’o loron mundiál ba traballadór, tanba ne’e ema-nia direitu no nesesidade,” nia hateten.
Entretantu, atividade marsa ne’e hetan apoiu husi parte seguransa Polísia Nasionál Timor-Leste (PNTL) hodi halo vijilánsia no husi parte Ministéria Saúde hodi asegura ema balun moras durante atividade la’o.
Notísia Relevante: Gabinete jurídiku KM sei halo revizaun ba ezbosu lei saláriu mínimu
Jornalista : Alexandra da Costa
Editór : Cancio Ximenes
