Ministru Tomás Cabral halo abertura reuniaun konsultivu territoriál
DILI, 14 marsu 2024 (TATOLI)—Ministru Administrasaun Estatál, Tomás do Rosário Cabral, kinta ne’e, halo abertura ba reuniaun konsellu konsultivu territoriál, ne’ebé partisipa hosi Prezidente Autoridade Munisipál (PAM) tomak inklui estrutura sira.
Reuniaun ne’e ho objetivu hodi PAM sira bele halo aprezentasaun kona-ba planu asaun anuál, planu orsamentu munisipál, planu aprovizionamentu, planu formasaun rekursu umanu, inklui progresu serbisu autoridade munisipál ninian.
“Ita presiza reuniaun konsultivu territoriál atu kada Prezidente Autoridade Munisípiu sira bele aprezenta planu sira tanba liuhosi planu anuál ne’e sei prodús orsamentu ba tinan 2025, tanba orsamentu sei aprova bazeia ba planu anuál no planu ezekusaun ne’ebé iha, nune’e husu ba autoridade munisipál ida-idak atu hahú identifika projetu hirak ne’ebé munisípiu ida-idak presiza hodi hatama ba iha planu anuál ne’e,” Ministru Tomás Cabral, hateten bainhira halo abertura reuniaun iha City-8, Manleuana.
Notísia relevante : MAE lansa projetu estudu SEDL 2024
Autoridade munisipál sira sei halo planeamentu ba sidade hodi hatama iha planu anuál no bele orsamenta iha fundu infraestrutura.
“Ha’u husu ba PAM sira ida-idak atu tau nia orsamentu ba planeamentu urbana nune’e bele koloka kedas ida ne’ebé mak fatin agrikultura, saúde, edukasaun ketak-ketak, imi foin atu hahú di’ak liu halo kedas identifikasaun nune’e bainhira halo planu orsamentu karik ho didi’ak hodi bele organiza ida-idak nia sidade,” Ministru fó hanoin.
Aleinde ne’e, planu orsamentu sei submete ba Programa Nasionál Dezenvolvimentu Suku (PNSD) inklui haree mós problema sosiál sira seluk.
Iha fatin hanesan, Prezidente Autoridade Munisípiu Ainaro, Manuela Carmo Bucar Corte Real, hateten, nia parte preparadu aprezenta munisípiu nia planu sira.
“Ami mai iha ne’e hodi simu orientasaun halo preprasaun ba planu asaun ba 2025, tanba ita hotu hatene orsamentu 2024 ne’e ami mai iha janeiru entaun orsamentu aprovadu ona ami hein ezekuta, entaun orsamentu ne’ebé aloka iha tinan ne’e 2024 la akomoda buat barak ne’ebé munisípiu presiza,” nia tenik.
Manuela Carmo espera, liuhosi sesaun ne’e sira bele prodús planu di’ak hodi bele responde ba atividade munisípiu iha área infraestrutura, agrikultura, saúde, edukasaun no seluk tan.
Primeiru-Ministru, Kay Rala Xanana Gusmão, husu ba PAM sira atu serbisu lori hakbesik Governu ba komunidade nune’e povu bele sente ukun-an ida-ne’e.
“Ita-boot sira-nia serbisu importante tebes tanba imi mak besik liu ba povu, nune’e nafatin jere osan povu nian ho di’ak tanba osan ne’e ran Estadu nian,” nia fó hanoin.
Jornalista : Arminda Fonseca
Editora : Julia Chatarina
