iklan

POLÍTIKA

PN konsidera ezekusaun OJE 2024 sei kiik

PN konsidera ezekusaun OJE 2024 sei kiik

Osan Dolar Amérika. Imajen/Espesiál

DILI, 14 marsu 2024 (TATOLI)—Parlamentu Nasionál (PN) liuhosi Prezidente Komisaun C trata asuntu Finansa Públika, lideradu hosi Deputada Cedelízia Faria dos Santos, akompaña hosi Deputadu membru komisaun, kinta ne’e, hala’o fiskalizasaun ba iha Ministériu Finansa (MF), hodi buka hatene ezekusaun Orsamentu Jerál Estadu (OJE) 2024.

Notísia Relevante: PN aprova proposta-lei OJE 2024 iha finál globál ho votu a-favór 41

“Papél Parlamentu nian mak liuliu ami komisaun C nia relasaun serbisu ne’ebé mak ligadu tebes ho serbisu Ministru Finansa. Entaun, loron ohin, ami halo fiskalizasaun ho objetivu atu mai haree ezekusaun Orsamentu Jerál Estadu (OJE) 2024, ne’ebé tuir ami to’o marsu tiha ona maibé nia ezekusaun to’o data ohin nia foin atinje 5,1%. Signifika ezekusaun kiikoan tebes, ami hakarak rona razaun tanbasá mak ezekusaun kiik,” Prezidente Komisaun C, Deputada Cedelízia Faria dos Santos, hateten ba jornalista sira hafoin hala’o fiskalizasaun iha edifísiu MF, Aitarak Laran.

Aleinde ne’e, iha fiskalizasaun ne’e komisaun hakarak mós hatene ezekusaun OJE 2023 ne’ebé hola parte hosi Orsamentu Retifikativu ne’ebé mak IX Governu Konstitusionál mak responsabiliza.

Ministra Finansa, Santina Cardoso, rekoñese ezekusaun OJE 2024 sei kiik tanba trimestre dahuluk seidauk hotu.

“Ezekusaun OJE) 2024 nian agora daudaun sei la’o hela. Hanesan, ohin, ha’u hato’o ezekusaun sei kiik hela tanba primeiru trismestre seidauk hotu. Hanoin, ezekusaun normalmente primeiru trimestre ministériu sira halo prosesu aprovizionamentu. Ezekusaun barak liu, ita halo iha saláriu de’it, bens serbisu sira-ne’e sei iha prosesu aprovizionamentu nia laran. Normalmente bainhira prosesu aprovizionamentu sira-ne’e konklui no projetu sira konklui, nia ezekusaun sei aumenta ba kada trimestre oin mai,” nia dehan.

Nia relata, kona-ba ezekusaun OJE 2023 ida-ne’ebé mak seidauk halo rekonsiliasaun agora daudaun kuaze atinje 83%.

Entertantu, tuir dadus husi Portál Transparánsia ne’ebé Agência Tatoli asesu ohin, haktuir katak orsamentál hatudu orsamentu orijen ba tinan fiskál 2024 mak $2,237,618,655.00, ne’ebé ho kompromisu $74,343,534.61, obrigasaun $16,177,212.44 ho atuál $129,699,136.98, balansu $2,049,753,195.85, ne’ebé koresponde ho 5.1%.

Notísia Relevante: PN aprova proposta Orsamentu Retifikativu biliaun $1,7 iha finál globál

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!