iklan

DEFEZA, HEADLINE

Majór Komandu Petrus no Antao konklui misaun ONU iha Sudaun Súl

Majór Komandu Petrus no Antao konklui misaun ONU iha Sudaun Súl

Major Komandu Petrus Ceunfin no Majór Komandu Antao Claudino termina misaun pás ONU nian iha Sudaun Súl. foto espesial.

DILI, 15 marsu 2024 (TATOLI) – Membru FALINTIL-Forsa Defeza Timor-Leste (F-FDTL), Majór Komandu Petrus Ceunfin no Majór Komandu Antao Claudino konklui ona misaun pás ONU iha Sudaun Súl ho susesu.

Majór Komandu Petrus no Antao hetan fiar hosi Xefe Estadu Maiór Jenerál (F-FDTL), Tenente Jenerál Domingos Raul Falur Rate Laek hodi reprezenta kontijénsia forsa armada Timor-Leste ba hala’o misun pás ONU nian iha Sudaun Súl iha 26 fevereiru 2023 no termina misaun iha 26 fevereiru 2024 no fila hikas mai Timor-Leste iha segunda (11/3) foin lalais ne’e.

“Ha’u ho kolega ida reprezenta forsa armada (F-FDTL) no ita-nia Estadu iha fevereiru 2023 disponibiliza hodi halo misun pás ONU nian iha Sudaun Súl, durante tinan ida semana rua”, Petru hateten ba jornalista sira iha Kuartel Jenerál F-FDTL Fatuhada, sesta ne’e.

Majór Komandu Petrus hateten, missun ONU nian iha Sudaun Súl nu’udar servisu militár profisionál hodi hala’o patrollu atu garante seguransa ne’ebé di’ak ba populasaun iha Sudaun Súl.

“Ami-nia servisu durante iha Sudaun Súl ne’e ami halo patrollu hodi garante seguransa ne’ebé di’ak ba povu Sudaun Súl no aleinde ida-ne’e mós iha patrollu nia laran, ami mai hasoru komunidade sira hodi fó hanoin ba sira ka partilla esperiénsia kona-ba ita-nia rai nian ba sira, ita nia kultura ba povu Sudaun Súl no fó hanoin ba sira oinsá atu bele prevene konflitu, atu nune’e sira bele harii pás tanba Sudaun Súl ne’e ita hatene rai konflitu, ida-ne’e ami halo durante halo misun pás ONU nian iha Sudaun Súl”, nia adianta.

Nia esplika, misaun ONU iha Sudaun Sul durante tinan ida no semana rua, iha mós dezafiu no difikuldade sira iha ámbitu halo patrollu maibé prontu nafatin simu risku no konsekuénsia hotu.

“Ha’u hanoin hanesan ema militár ne’ebé halo misun sempre iha risku, dezafiu no difikuldade, hanesan ita-nia seguransa pesoál tanba ita halo misaun iha nasaun konflitu sempre iha risku, atu evita ida-ne’e, hanesan militár tenke prontu simu buat hotu”, nia haktuir.

“Tanba Sudaun Súl ne’e nasaun ne’ebé konflitu, iha problema ne’ebé ke komplexu tanba ne’e mak ita tenke hatene oinsa ita halo patrollu no bainhira halo aproximasaun ho komunidade liuliu hasoru komunidade sira”, nia afirma.

Petrus konta, misaun ida-ne’e iha Sudaun Súl, iha maluk militár balun hetan kanek tanba tama ba ema nia enbuskada no nia maluk hetan detensaun.

“Ha’u ho kolega la iha buat ruma, to’o termina ami-nia misaun pás ONU nian, ha’u atu dehan de’it katak durante halo misaun pás iha Sudaun Súl la iha forsa ida mak mate, maibé problema bo’ot ne’ebé ami hasoru mak maluk balun tama iha enbuskada ne’ebé grupu iha Sudaun Súl halo, hodi hakanek ami nia kolega sira no aleinde ida-ne’e militár Sudaun Súl mós halo detensaun ba ami nia maluk militár sira maske nune’e ho koordenasaun ONU, ami-nia maluk sira ne’e liberta fila fali”, nia informa.

“Ha’u la iha sentimemtu tauk hanesan militár uza farda no reprezenta Estadu, la tauk no tenke tane ita nia forsa no Estadu tanba família mak tenke komprende ami-nia situasaun no família prontu atu simu iha sitausaun saida de’it”, nia afirma.

Nia dehan, hafoin misaun konklui, preparativu agora mak halo hela relatóriu hodi relata servisu misun pás iha Sudaun Súl no partilla esperiénsia balun kona-ba servisu misaun pás nian ba maluk na’in-rua ne’ebé sei troka hodi halo misaun pás iha Sudaun Súl.

“Ha’u sei partilla esperiénsia balun durante ami-nia servisu pás iha Sudaun Súl, ba fali ha’u-nia kolega sira ne’ebé sei troka ami rua atu aranka iha fulan ne’e ba halo misaun pás ONU iha Sudaun Súl, ita tenke ko’alia buat ruma hodi sira-nain rua bele la’o tuir tanba bainhira halo servisu iha Sudaun Súl iha dezembru tinan ne’e, sei iha eleisaun iha rai refere, hanesan nasaun konflitu ita presiza partilla espriénsia ne’ebé ita iha atu sira nain rua bele la’o tuir”, nia konklui.

Nia dehan, hafoin remata misaun pás ONU nian iha Sudaun Súl, hanesan ema militár sei kontinua servisu hanesan ema militár iha Institusaun F-FDTL.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!