DILI, 15 marsu 2024 (TATOLI)—Diretór Nasionál Pensaun no Subvensaun, Manuel Araújo dos Santos, klarifika katak lista ne’ebé daudaun taka sai iha postu administrativu sira ne’e la’ós rezultadu validasaun veteranu rejistradu 2009.
“Lista veteranu rejistu iha tinan 2009 seidauk taka sai tanba bainhira atu taka sei liuhosi aprovasaun hosi reuniaun Konsellu Nasionál ne’ebé hetan editadu mak foin taka sai, ne’ebé lista agora taka sai ne’e maihosi veterenu rejistradu iha tinan 2003-2005 editadu iha 2008-2015,” Manuel Araújo informa ba Agência Tatoli, via telefónika, sesta ne’e.
MAKLN fó sai lista iha loron 01 marsu 2024 iha postu administrativu ne’e hanesan lista períodiku ne’ebé kada fulan-tolu ministériu aviza ba kombatente no benefisiáriu sira ne’ebé balun inkompletu antes ne’e, foin halo kompletu no balun hanesan benefisiáriu maibé mate hafoin aprovadu, entaun tuir dekretu-lei pensaun nian bele atribui fali ba família, ho ida-ne’e mak tenke taka sai avizu.
“Normalmente sira husu pensaun, entaun sira-nia prosesu foin aprova tenke fiksa loron-30 mak halo reklamasaun nune’e hotu halo pagamentu,” nia akresenta.
Notísia relevante : Membru PN husu MAKLN aselera validasaun naran veteranu rejistadu 2009
Tuir dadus, ministériu halo ona pagamentu ba pensaun 52.705 no benefisiáriu hamutuk 55.878 hahú tinan 2008 to’o agora.
Ko’alia kona-ba pensaun no benefisiáriu rua ne’e la hanesan, kona-ba pensaun mak hanesan pensaun moris, sobrevivénsia, reforma, substénsia no sira ne’ebé simu prestasaun únika ninian hanesan 4 a 7 simu dala-ida de’it, enkuantu benefisiáriu ne’e hanesan númeru ne’ebé mak benefisia pensaun, tantu kombatente rasik nomós benefisiáriu sira hosi pensaun sobrevivénsia ne’e.
“Diferente ne’e mak mai hosi pensaun sobrevivénsia tanba pensaun martir ida ninia benefisiáriu ne’e rua, tolu ka haat liuhosi ida bele simu,” Diretór esplika.
MAKLN konsege ezekuta ona orsamentu $21.131.590,1 hahú hosi tinan 2008 to’o ohin loron.
Jornalisa : Arminda Fonseca
Editora : Julia Chatarina
