iklan

COVALIMA

Membru asembleia 22 iha postu Suai simu pose

Membru asembleia 22 iha postu Suai simu pose

Membru asembleia 22 iha postu Suai ne'ebé simu pose. Imajen/Celestina Teles.

COVALIMA, 15 marsu 2024 (TATOLI) – Membru asembleia na’in-22 iha postu administrativu Suai, munisípiu Covalima, simu pose hodi asume knaar ba periódu 2024-2026. Serimónia ne’e dirije husi Sekretáriu Munisipál ba Administrasaun no Finansa, Alberto Moniz de Araújo.

Prezidente Asembleia Postu Administrativu Suai, Idelfonso Maria Amaral, dehan membru asembleia ne’ebé simu ona pose iha ona legalidade, nune’e presiza halo avaliasaun ba projetu ne’ebé mak atu implementa iha 2025.

“Ami hetan  ona  legalidade ba membru asembleia postu administrativu Suai. Ami-nian planu hakarak halo avaliasaun ba projetu ne’ebé mai husi Programa Nasionál Dezenvolvimentu Suku [PNDS], PDIM [Programa Dezenvolvimentu Integradu Munisipál] no grande projetu sira ne’e sai hanesan ami-nian orden traballu”, nia informa.

Membru asembleia 22 iha postu Suai simu pose. Imajen/Celestina Teles.

Iha sorin seluk, Sekretáriu Munisipál ba Administrasaun no Finansa, Alberto Araújo, esplika, tuir matadalan asembleia postu administrativu no diploma ministeriál númeru 50/2016, ko’alia kona-ba funsionamentu membru asembleia postu administrativu sira. Membru asembleia postu mak órgaun konsulta administrasaun postu admiistrativu iha matéria promosaun no dezenvolvementu sósiuekonómiku postu administrativu nian hodi halo diskusaun iha nivél postu lori bá iha munisípiu.

“Misaun asembleia postu atu garante partisipasaun lideransa komunitária, reprezentante sosiedade sivíl no populasaun iha prosesu desizóriu lokál, prinsipalmente hato’o paresér ho identifikasaun no prioritizasaun nesesidade lokál ba realizasaun investimentu públiku hodi promove dezenvolvementu lokál no hadi’a liután organizasaun funsionamentu no kualifikasaun ba prestasaun servisu administrasaun lokál”, hatete iha Tabakolot, ohin.

Nia salienta katak kompeténsia husi asembleia postu mak atu fó paresér ba proposta planu asaun anuál (PAA), relatóriu anuál kona-ba evolusaun no ezekusaun fízika no finanseira, proposta orsamentu ho nia relatóriu anuál ba ezekusaun orsamentál, proposta planu anuál aprovizionamentu no relatóriu anuál ba evolusaun ezekusaun fízika finanseira, proposta planu formasaun anuál ba rekursu umanu no relatóriu anuál ba evolusaun no ezekusaun fizika finanseira.

Aleinde ne’e, proposta projetu investimentu públiku ne’ebé hakerek iha planu investimentu munisípal no relatóriu kona-ba ezekusaun fízika no finanseira, proposta projetu ne’ebé hetan alokasaun orsamentu husi PNDS, nomós relatóriu ba ezekusaun fízika no finanseira,  kualidade ba bens no servisu ne’ebé presta husi órgaun no servisu administrasaun lokál Estadu iha área postu dministrativu, dezempeñu administradór postu administrativu no xefe servisu lokál no kestaun seluk ne’ebé submete husi administradór postu ba prezidente autoridade.

Membru asembleia postu kompostu husi administradór postu administrativu, xefe servisu lokál administrasaun, reprezenta dirijente servisu munisípal no delegasaun territóriál sedeada iha área postu administrativu, xefe suku sira ne’ebé dezempeña funsaun iha área postu administrativu ida-idak.

Lia-na’in ne’ebé hili husi konsellu suku no dezempeña funsaun iha área postu administrativu, reprezenta na’in-rua husi antigu Kombatente Libertasaun Nasionál, reprezenta na’in-rua husi órgaun promotora igualdade jéneru no reprezenta na’in-rua hosi juventude postu administrativu.

Rekizitu atu sai membru asembleia sidadaun timoroan ho tinan 17, hela fatin korresponde ba área asembleia postu no iha kartaun eleitorál tuir unidade jeográfika juridisaun postu administrativu sira.

Hafoin simu pose sai membru asembleia, pesoál sira ne’e kontinua kedan halo diskusaun ba planu investimentu integradu munisipál tinan 2025 hamutuk proposta 13 mak hanesan konstrusaun edifísiu postu administrativu Suai ho ekipamentu no postu seguransa,  konstrusaun postu saúde Gala no  rezidénsia ba pesoál saúde, harii postu saúde Suai-Loro no rezidénsia médiku, konstrusaun estrada rurál,valeta husi suku Beco bá aldeia Tudilpo, Gala, Teda no Tobur.

Konstrusaun edifísiu eskola bázika sentrál primeiru to’o terseiru siklu Gala, konstrusaun sistema bee-moos, konstrusaun matadouru iha aldeia Sanfuk, perfurasaun no instalasaun sistema bee-moos iha aldeia Busacucun no harii edifísiu eskola bázika filiál Lakonak-Babo.

Konstrusaun estrada, valeta haleu aldeia Holba, Meop, iha suku Labarai, harii ponte ki’ik, valeta no sirtu husi aldeia Sanfuk liga ba semitériu Oedare no loke estrada foun liga bá merkadu Ladi no konstrui valeta.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!