DILI, 15 marsu 2024 (TATOLI)—Primeiru-Ministru (PM), Kay Rala Xanana Gusmão, dejeza kandidatu profesór 13.021 atu labele lakon esperansa bainhira la liu iha ezame eskrita ba bolsa rekrutamentu ba profesór sira.
Notísia Relevante: Aplikante bolsa rekrutamentu ba profesór 13.021 admitidu atu tuir teste eskrita
“Ha’u dejeza imi kandidatu 13.021, katak se laliu labele lakon esperansa.
Kandidatu sira esforsu aan ba, lalika lakon esperansa katak la liu agora karik laiha ona, lalika halo protesta maibé prepara aan ba oportunidade seluk. Tanba, edukasaun mós presiza hadi’a nafatin sistema tanba iha área rurál labarik sira la konsege ba eskola,” Xefe Governu ne’e hateten iha nia diskursu, iha abertura teste eskrita eletrónika ba bolsa rekrutamentu ka kandidatu ba profesór, iha salaun Komisaun Funsaun Públika (KFP), Dili, sesta ne’e.
Profesór sira-ne’ebé liu ne’e labele kontente tanba manán osan maibé liu tanba tama ona ba misaun ida-ne’ebé importante tebes hodi eduka oan sira, tanba servisu la’ós atu manan osan maibé servisu ne’e hanesan misaun ida atu serbí no atu fó, no servisu rua ne’e mak edukasaun no saúde.
Problema edukasaun la’ós problema fó servisu ba ema, maibé problema edukasaun lori ema ba hanoin aspetu hotu-hotu, sei prepara timoroan sira hosi kiik iha future.
“Nune’e, IX Governu Konstituisional ezije kualidade ensinu nível universidade maibé ita laiha, bele iha kualidade profesór, se alunu la preparadu, hosi kraik mai,” nia hateten.
Dezenvolvimentu Timor-Leste la’ós ema hotu-hotu mai iha Dili, maibé tenke loke kondisaun iha área rurál no iha aldeia ne’ebé dook, nune’e labarik sira bele ba eskola ka bele asesu edukasaun ho di’ak.
Totál aplikante ne’ebé aplika ba bolsa rekrutamentu ka kandidatu ba profesór sira-ne’e hamutuk rihun 14-resin maibé ida-ne’ebé admitidu ne’e hamutuk 13.021, kompostu hosi feto hamutuk 7.924 no mane mane hamutuk 5.097, no la admitidu hamutuk 1.131 ne’ebé kompostu hosi feto 678 no mane 453.
Notísia Relevante: 15 marsu: Aplikante bolsa rekrutamentu ba profesór sei tuir teste eskrita
Jornalista : Osória Marques
Editór : Cancio Ximenes
