DILI, 15 marsu 2024 (TATOLI)— Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florêncio da Costa Sanches, informa, SERVE,I.P daudaun ne’e loke ona vaga tanba ne’e husu ba eis-funsionáriu 166 ne’ebé kontratu ramata iha 31 dezembru 2023 atu konkorre fila fali.
“Sira 166 ne’ebé kontratu ramata iha 31 dezembru ne’e iha direitu tomak atu konkorre fali tanba sira ne’e iha esperiénsia barak. Balun servisu tinan hitu, balun tinan rua no tinan tolu. Prosedimentu no rekezitu ne’ebé mak iha nafatin ho tinan kotuk ne’ebé mak SERVE aplika ba públiku tanba karta ne’ebé mak fó sai husi MKAE katak tenke tuir lei funsaun publika,” Florêncio da Costa Sanches informa ba TATOLI iha nia kna’ar fatin Matadouru, ohin.
Nia esplika, Vise-primeiru Ministru no Ministru Asuntu Ekonómiku no Ministru Turizmu, Ambiente, hasai despaxu katak atu rekruta ema na’in-10. Labele liu ida ne’e. Ho ida ne’e mak husu ba eis-funsionáriu sira ne’ebé mak kontratu ramata iha tinan kotuk bele konkorre tanba ida ne’e desizaun husi nível altu la’ós diretór mak hasai ida ne’e.
“Vise-primeiru Ministru no Ministru Asuntu Ekonómiku no Ministru Turizmu, Ambiente hasai despaxu katak atu rekruta ema na’in 10 ne’e iha loron 20 fevereiru no ami simu iha 6 fulan marsu. Husi loron ida ne’e, ami loke kedas vaga atu nune’e eis-funsionáriu na’in 166 bele konkore,” nia haktuir.
Ezekutivu ne’e esplika, husi vaga ne’e mak sira la liu la’ós diretór nia kulpa tanba supervisor sira mak fó teste ba sira. Hanesan diretór, kumpri desizaun sira ne’ebé mak ministru fó.
Kriteira sira ba avaliasaun dezempeñu ne’e bazeia ba forma kritériu sira husi Komisaun Funsaun Públika (KFP) ne’ebé mak durante ne’e implementa.
“Ha’u sei simu rezultadu avaliasaun dezempeña ida ne’e iha loron 19 marsu tinan ne’e depois publikasaun ba rezultadu avaliasaun no sira ne’ebé mak liu iha prosesu avaliasaun sei publika iha loron 20 to’o 24 tinan ne’e,” nia afirma.
Diretór Ezekutivu SERVE, I.P, Florêncio da Costa Sanches, esplika, ba sira ne’ebé mak liu iha avaliasaun sei asina kontratu 25-29 marsu no kontratu nia durasaun sei halo tinan ida-ida.
“Ba sira ne’ebé mak asina kontratu iha loron 25-29 marsu, sei tama servisu iha loron 1 abríl hodi kontinua ho formasaun no seluk tan ne’ebé nesesariu atu hala’o,” diretór ne’e esplika.
Iha sorin seluk, Vise-primeiru Ministru no Ministru Asuntu Ekonómiku no Ministru Turizmu, Ambiente, Francisco Kalbuadi Lay informa, antes hala’o servisu ida ba Abu-dabhi fó autorizasaun ba Institutu Públiku no Empreza públiku ne’ebé mak tutela iha MKAE atu rekruta tan ema na’in-10.
“Antes ha’u sai ba Abu-dabhi, ha’u fó autroizasaun ba dirijente EP no IP atu rekruta tan na’in-10 hodi asegura ba iha aprovizionamentu, finansa no administrasaun. Entaun, husu idaidak tuir rekrutamentu ne’ebé mak iha,” Francisco Kalbuadi Lay konklui.
Notísia relevante:Funsionáriu 166 husu Diretór SERVE,I.P avalia dezempeñu servisu
Jornalista : Felicidade Ximenes
Editór: Rafael Ximenes de A. Belo
