DILI, 22 fevereiru 2024 (TATOLI)—Funsionariu Servisu Rejistu no Verifikasaun Emprezariál, Institutu Públiku (SERVE, I. P),hamutuk 166 ne’ebé daudaun ne’e la servisu ona iha SERVE.IP husu ba Diretór atu halo avaliasaun mós ba sira-nia dezempeñu servisu, tanba sira tuir rekrutamentu prosesu naruk ida no teste iha sistema ne’ebé mak estebelese iha Komisaun Funsaun Públika (KFP).
“Ami funsionariu husi SERVE,I.P hamutuk 166 pessoas ne’ebé tuir rekrutamentu liu husi prosesu naruk ida no teste iha sistema ne’ebé estabelese iha komisaun funsaun públika (KFP), ne’ebé funsionariu sira balun tama iha tinan 2013, 2015, 2017, 2020 no 2022 nian mak liu iha prosesu refere, tanba ne’e ami hakarak husu tulun ba Vise-primeiru Ministru no Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay atu fó solusaun di’ak ida ba ami hodi nune’e ami bele hala’o fali ami nia kna’ar hanesan baibain,” Portavóz Benjamin Pinto hateten liuhusi Konferénsia imprensa iha Jardin Motael, ohin.
Benjamin dehan, husi funsionáriu 166 daudaun ne’e kontratu sei moris to’o 31 dezembru 2027, maibé desizaun Diretór SERVE, I.P liuhusi Pareser jurídiku (PJ) ne’ebé hatun rasik despaxu hodi hamate ona sira-nia “ahi-matan’ ka dapur, nune’e sira husu ba Vise-primeiru Ministru no Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay atu bele fó alternativu ka solusaun ruma ba ida ne’e.
“Ami-nia kontratu moris hela maibé desizaun Diretór SERVE, I.P liuhusi pareser jurídiku (PJ) ne’ebé hatun rasik despachu hodi hamate ona ami-nia ahi matan, no hakarak husu ba Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, Francisco Kalbuadi Lay atu bele fó alternativu ka solusaun diak ida ba ami,” nia afirma.
Portavóz ne’e hateten, relasiona ho asuntu ne’e hanesan funsionáriu SERVE, I.P, hakarak hato’o ba media sira hotu bazeia ba desizaun Diretór Ezekutiva SERVE, I.P, hodi sakrifika ka hapara funsionáriu sira-nia direitu kontratuál bazeia ba termu kontratu ne’ebé institusionalmente selebra ho funsionáriu sira ho durasaun tinan lima no loron ramata kontratu iha 31 dezembru 2027.
Antes ne’e, funsionáriu hirak ne’e liuhusi prosesu rekrutamentu ka konkursu públiku ne’ebé públika liuhusi KFP no funsionáriu balun servisu tinan ida ho balun, tinan ha’at, tinan hitu, timan tinan ualu, tinan sanulu, hodi sai hanesan funsionariu SERVE, I.P ho durasaun kontratu ne’ebé hanesan, funsionáriu hirak ne’e mós tuir formasaun iha rai-laran no rai-li’ur, ne’ebé komprende diak ona sistema servisu, maibé iha situasaun atuál ne’ebe funsionariu 166 pessoas daudaun ne’e hasoru mak hanesan:
Dahuluk, iha loron 17 fulan dezembru 2023 SERVE, I.P, simu notifikasaun husi Ministru Koordenadór Asuntu Ekonómiku, hodi hateten katak husu, ba dirijente másimu Instituisaun Públiku no Empreza Públiku, inklui mós SERVE, I.P atu notifika funsionáriu sira ne’ebé kontratu termu sertu ne’ebé sei termina iha loron 31 fulan dezembru 2023 no sei labele halo renovasaun no tuirmai.
Daruak, iha loron 29 fulan dezembru 2023 diretór SERVE,I.P realiza kedan enkontru ofisiál ida ho funsionáriu hotu, inklui Munisípiu ho RAEOA halo avizu jerál no lahalo notifikasaun ba funsionáriu por pessoa aleinde ne’e Diretór mós halo tan interpretasaun Pareser Jurídiku ida ne’ebé hatun despaxu rasik iha Aliña C, hodi hateten katak juridikamente funsionáriu la iha relasaun ona ho SERVE,I.P mezmu kontratu sei moris signifika katak dirijente dezobidénsia saida mak hakerek iha notifikasaun, maibé konsidera liu pareser jurídiku ikusmai husu ba funsionáriu sira mantein kontaktu bainhira iha desizaun ruma husi MKAE, maibé to’o ohin loron la iha informasaun husi dirijente másimu.
Datoluk, iha loron 22 fulan janeiru 2024, diretór SERVE, I.P fó sai deklarasaun ba media ne’e signifika dezobedénsia tebes desizaun husi Ministru Koordenadór Asuntu Ekonómiku (MKAE) nian, ne’ebé hato’o liuhusi notifikasaun husi deklarasaun refere Diretór Ezekutivu SERVE,I.P husu, fila fali ba Ministru no liuhusi media katak funsionáriu SERVE,I.P hamutuk 166 pessoas ne’ebé, agora daudaun sira-nia pozisaun mamuk hela, karik desizaun Ministru nian atu halo fali rekrutamentu foun ka oinsá, signifika Diretór SERVE, I.P iha intensaun ne’ebé la di’ak ba nia funsionáriu rasik ho totál 166 pessoas ne’ebe ho durasaun kontratu to’o 31 dezembru 2027.
Diretór Ezekutivu Rejistasaun no Verifikasaun Emprezariál, Institutu Públiku (SERVE, I.P), Florêncio da Costa Sanches, hateten, SERVE, I.P halo avaliasaun ba funsionáriu kontratadu hamutuk 64 iha fulan marsu hafoin aprezenta ba Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, Francisco Kalbuadi Lay atu foti desizaun.
“Agora daudaun ha’u la’o servisu nian ba rai-li’ur, depois ha’u fila mai iha loron 1 fulan marsu mak avalia sira ne’ebé mak daudaun hala’o hela servisu hamutuk 64, tanba antes ne’e sira mós atu sai, maibé Ministru dehan haree fila fali sira-nia servisu mak sira kontinua servisu ne’e,” Florêncio Sanches informa ba TATOLI via telefónika, ohin.
Nia esplika, antes ne’e, funsionáriu kontratadu hamutuk 230 husi ne’e sira ne’ebé mak kontratadu hotu iha 31 ezembru ne’e hamutuk 166, entaun sira tuir saida mak simu husi dokumentu ofisiál iha sira-nia liman hateten katak dezde loron 1 janeiru mai oin sira la iha ona relasaun jurídiku ho SERVE, I.P.
“Ami-nia funsionáriu antes ne’e hamutuk 230. Husi ne’e 64 mak hala’o servisu, maibé 166 ne’e tuir saida mak simu ona husi dokumentu ofisiál iha sira-nia liman hateten katak dezde loron 1 janeiru mai oin sira la iha ona relasaun jurídiku ho SERVE, I.P,” ezekutivu ne’e afirma.
Líder másimu SERVE, I.P rekorda, antes ne’e, Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, hateten ona katak sei halo mudansa ba re-estrutura sira nune’e sei akontese iha fulan ida ne’e.
“Vise-primeiru Ministru hateten ona katak sei halo re-estrutura ne’ebé sei akontese iha fulan ida ne’e entaun depois estrutura foun mak sei organiza fila fali oinsá atu prienxe fali, maibé instrusaun ne’ebé mak Vise-primeiru Ministru fó sai ne’e klaru tebes ona ba ami sira ne’ebé mak tutela ne’e katak se mak iha kapasidade hatene servisu kontinua no se mak servisu la loos instituisaun sira haree ba ida ne’e,” nia haktuir.
Iha fatin hanesan, Prezidente Sentru Lojístika Nasionál (CLN), Jervazio Cardoso informa, CLN nia funsionáriu kontratadu ne’ebé mak kontratu ramata iha 31 dezembru hamutuk 220-resin no funsionáriu permanente hamutuk 21 ne’ebé durante hala’o servisu iha aramazen.
“Kona-ba avaliasaun ami-nia kada diresaun mak sei avalia depois naran sira ne’e ami sei aprezenta hotu lista ba Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, tanba nia mak iha responsabilidae haree atu mantein ka lae ida ne’e desizaun altu nian,” Jervazio Cardoso tenik.
Nia relata, husi lista sira ne’e dirijente sira husi CLN enkontru iha orsida lorokraik, hafoin aprezenta lista ne’e ba iha Vise-primeiru Ministru hodi haree no foti desizaun sira tuir mai.
Antes ne’e, Inspetór Jerál Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA), Ernesto Monteiro, dehan, durante ne’e AIFAESA nia funsionáriu hamutuk 123. Husi ne’e, funsionáriu kontratadu hamutuk 118 mak kontratu ramata iha 31 dezembru 2023.
“Ami planu atu hato’o proposta sira ne’e iha semana ne’e ba Ministru katak funsionáriu sira ne’e mai tomak fila fali, maibé depende mós ba Ministru nia desizaun ho nune’e funsionamentu ne’ebé mak durante la la’o bele la’o hikas fila fali hanesan tinan uluk liu ba,” nia relata.
Nune’e, iha loron segunda 19 fevereiru, Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, Francisco Kalbuadi Lay, bolu ona instituisaun sira ne’ebé tutela hodi ko’alia kona- ba funsionáriu kontratadu sira ne’ebé kontratu ramata iha 31 dezembru atu avalia fila fali molok hala’o servisu.
“Ha’u halo reuniaun jerál ida hamutuk ho Empreza Públiku (EP) ho Instituisaun Públiku (IP) sira kona-ba funsionáriu kontratadu sira ne’ebé mak kontratu hotu iha 31 dezembru. Entaun, ida ne’e ha’u entrega ona ba kada IP no EP sira atu haree hanesan sira ne’ebé mak iha kapasidade no esperiénsia di’ak bele servisu nafatin, maibé ba sira ne’ebé mak servisu ladun di’ak bele tuir fali selesaun sira ne’ebé tuirmai,” Francisco Kalbuadi Lay dehan ba jornalista sira.
Ministru Kalbuadi hateten, iha reuniaun ne’e mós sei haree ba prioridade servisu 2024 nian, tanba ne’e Governu seidauk halo mudansa ruma ba iha Instituisaun Públiku no Empreza Públiku sira.
“Ami seidauk iha buat ruma atu muda Empreza Públika ho Institutu Públiku sira, tanba ami la iha buat ruma atu muda, maibé nafatin hanesan uluk,” nia esplika.
Instituisaun ne’ebé mak tutela iha Ministru Koordenadór Asuntu Ekonómiku mak hanesan Autoridade Inspesaun no Fiskalizasaun Atividade Ekonómika Sanitária no Alimentár (AIFAESA), Servisu Rejistu no Verifikasaun Emprezariál, Institutu Públiku (SERVE, I.P), Institutu Nasionál Dezenvolvimentu de Mão- de- Obra (INDMO), Institutu Apoiu Dezenvolvimentu Emprezariál (IADE), Institutu Kualidade Timor Leste (IQTL), Autoridade Turizmu Timor-Leste (ATTL), Sentru Nasionál Formasaun Profisionál no Empregu Timor-Leste (CNFPE), Sentru Nasionál Formasaun Profisionál – Bekora (CNFP-Bekora), Inspesaun-Jerál Traballu (IGT), Sentru Konvensaun Dili (CCD), Institutu Peskiza, Dezenvolvimentu, Formasaun no Promosaun Bambu, I.P. (Institutu Bambu),
Tuirmai, Komisaun Nasionál ba Fasilitasaun Komérsiu (CONFAC), Ajénsia Promosaun ba Investimentu no Esportasaun Timor-Leste, I.P. (TradeInvest Timor-Leste, I.P.), GESPIN – Jestaun Parke Industriál, S.A., Sentru Lojístiku Nasionál (CLN), Sentru Turizmu no Informasaun Turístika, Sentru Restaurasaun/Food Courts, Pouzada, Autoridade Nasionál Lisensiamentu Ambientál, I.P. (ANLA), no Autoridade Nasionál Dezignada ba Kombate Alterasaun Klimátika, I.P. (ANDKAK).
Notísia relevante:Avaliasaun ba funsionáriu kontratadu SERVE, I.P sei hala’o iha marsu
Jornalista : Felicidade Ximenes
Editór: Rafael Ximenes de A. Belo
