DILI, 15 marsu 2024 (TATOLI)—Sekretáriu Ezekutivu Nasaun Ko’alia Lian Portugés (CPLP, siglá protugés), Zacarias Albano da Costa, aprezenta no atualiza serbisu Sekretáriu Ezekutivu ba Prezidente Parlamentu Nasionál, Maria Fernanda Lay ho kompozisaun meza.
Notísia Relevante: Zacarias Albano atualiza servisu Sekretáriu Ezekutivu CPLP ba Xefe Estadu
“Mai ko’alia ho Prezidente Parlamentu no vise Prezidente, tanba Parlamentu Timor hola parte órgaun ida CPLP ne’ebé hanaran Asembleia Parlamentár CPLP nian. No, daudaun ne’e vise Prezidente PN mak sai nu’udar Prezidente grupu nasionál Asembleia Parlamentár CPLP nian. Mai atualiza ba Prezidente Parlamentu ho ninia ekipa, kona-ba atividade ne’ebé hala’o dezenvolvimentu ne’ebé iha partikularmente kona-ba reuniaun ne’ebé ami halo iha vizita traballu ne’ebé halo mós ho Primeiru-Ministru, Konsellu Ministru no Prezidente Repúblika ho sosiedade sívil,” Sekretáriu Ezekutivu CPLP, Zacarias Albano da Costa, hateten hafoin ramata enkontru iha sala konferénsia PN.
Ida-ne’e pasu ida importante hodi mantein Timor-Leste nia autoridade no mós apár ho situasaun dezenvolvimentu atividade iha CPLP nian laran.
Nia louva esforsu parte hotu-hotu nian hodi promove lian portugés iha Timor-Leste nu’udar lian ofisiál, nune’e nu’udar sekretáriu ezekutivu CPLP no hanesan mós timoroan kontente tebes autoridade iha Timor-Leste ne’e.
Sosiedade sívil liuhosi universidade halo esforsu ba ko’alia portugés hosi estudante sira, hanoin neineik no beibeik, timoroan tenke ko’alia nafatin no buka CPLP apoiu oinsá mak aumenta no vontade polítika iha no vontade ida-idak nian hodi bele aprende portugés.
“Ha’u kontente tebe-tebes tanba bele haree debate ne’ebé ami halo iha Konsellu Ministru halo ho lian portugés, Ministru sira-ne’ebé ko’alia portugés ho di’ak. Ha’u ba fali universidade, estudante sira no reitór iha UNTL, UNDIL sira hotu ko’alia portugés. Ne’ebé, ita halo esforsu duni, halo esforsu ko’alia portugés,” nia hateten.
Notísia Relevante: PPN-Zacarias Albano diskute haforsa implementasaun língua portugeza iha TL
Jornalista : Nelson de Sousa
Editór : Cancio Ximenes
