DILI, 16 marsu 2024 (TATOLI)—Diretór Eskola Ensinu Sekundáriu Jerál (ESJ) 04 Setembru UNAMET Balide, Martinho de Menezes, preokupa tanba besik tama ona ezame períodu dahuluk, ne’ebé sei akontese iha loron 01 abríl 2024, maibé to’o agora seidauk iha kaderneta eskolár hodi distribui ba estudante foun.
“Ezame besik ona maibé ami seidauk simu kaderneta foun ba ha’u-nia estudante foun 735. Proposta haruka ona ba Ministériu Edukasaun (ME) maibé seidauk haruka mai ami, ne’ebé ita hein de’it,” Diretór hateten ba Agência Tatoli, via telefónika, sábadu ne’e.
Notísia relevante : ME distribui tan kaderneta eskolár rihun 48
Aleinde ne’e, númeru ne’e seidauk konta ho estudante désimu anu ne’ebé la pasa iha tinan kotuk.
“Kaderneta ne’e kada tinan ita mak kálkulu, maibé ba tinan ne’e Ministériu Edukasaun mak halo kálkululasaun, ne’ebé deside ba ami Eskola 04 Setembru ne’e hamutuk 675. Ida-ne’e la to’o tanba estudante ne’ebé la pasa barak, désimu anu iha 150 ba leten, nune’e mós ho désimu primeiru. Númeru ida-ne’e liu ona kaderneta, Uluk ne’e ita simu 1.000 ba leten,” nia akresenta.
Iha sorin seluk, Koordenadór Gabinete Unidade Kurríkulu Nasionál ME, João Maupelu, informa, ME prepara tinan ne’e atu distribui tan kaderneta eskolár 40.000 ba eskola ensinu sekundáriu jerál iha territóriu.
“Tinan ne’e hahú ona prodús no hein kuandu kompleta mak ita distribui ba ensinu sekundáriu jerál sira iha Timor-Leste. Tanba tinan kotuk ita distribui ona 65.000, nune’e 40.000 ne’e ba estudante anu letivu 2024 nian de’it,” Maupelu tenik.
Sentru imprensaun imprime 40.000 ba kada nível eskolaridade, maibé ba ensinu tékniku vokasionál tinan ne’e sufisente nune’e sentru imprensaun la imprime.
Jornalista : Osória Marques
Editora : Julia Chatarina
