DILI, 21 fevereiru 2024 (TATOLI)-Ministériu Edukasaun liuhosi Diresaun Unidade Kurríkulu Nasionál, iha semana kotuk distribui tan kaderneta eskolár hamutuk rihun 48 ba Eskola Pre-Eskolár (EPE) no Ensinu Báziku (EB) hosi primeiru no segundu siklu iha territóriu Timor-Leste.
Koordenadór Gabinete Unidade Kurríkulu Nasionál Ministériu Edukasaun, João Maupelo, hateten iha tinan 2023, ME prodúz ona kaderneta eskolár hamutuk rihun 65-resin.
Notísia Relevante :Ministériu Edukasaun sei imprime kaderneta eskolár rihun 135
“Ida-ne’e ita atirbui kontinuasaun nian ba eskola iha munisípiu ne’ebé mak husu, ba ensinu sekundáriu sira no tékniku vokasionál sufisiente hela. Kaderneta ba primeiru no segundu siklu agora distribui tan 34.400, ne’e kompleta de’it ona tanba balun tinan uluk distribui tiha ona. Ida-ne’e bazea ba pedidu hirak-ne’ebé mai husi munisípiu, no pre eskolár nian prodús tan rihun 13.600,” nia hateten ba TATOLI, iha ninia servisu fatin Villa-Verde, Dili, kuarta ne’e.
Hosi kaderneta eskolár hamutuk 34.400 ba Ensinu Báziku primeiru no segundu siklu konsege distribui hotu ona bá munisípu Aileu hamutuk 3.000, Ainaro 2.400, Baucau 5.000, Bobonaro 4.000, Covalima 1.600, Dili 2.400, Ermera 4.000, Lautém 4.000, Liquiça 800, Manatuto 1.200, Manufahi 2.800, Rejiaun Administrativa Espesiál Oé-cusse Ambeno (RAEOA) 800, no Viqueque, 3.200.
Enkuantu, nia dehan kaderneta eskolár ba EPE rihun 13.600 ne’e, distribui bá munisípiu Aileu 800, Ainaro 800, Baucau 1.600, Bobonaro 1.600, Covalima 800, Dili 1.600, Ermera 1.600, Lautém 800, Liquiça 800, Manatuto 800, Manufahi 800, Rejiaun Administrativa Espesiál Oé-cusse Ambeno (RAEOA) 800, no Viqueque, 800.
Nia hateten ba tinan ida ne’e, Ministériu Edukasaun seidauk prodúz kaderneta foun hodi distribui ba eskola sira tanba daudaun ne’e sei iha prosesu aprovizionamentu ministériu nian, depois prosesu aprovizionamentu remata maka foin loke konkursu ba kompañia sira atu konkore hodi prodús kaderneta foun ba tinan 2024 tuir nesesidade eskola sira nian.
Kona-ba kaderneta ne’ebe maka sira distribui ona, nia relata daudaun ne’e rai iha Servisu Edukasaun Munisipál iha munisípiu ida-idak, tanba ne’e husu ba eskola ida-idak atu bá foti iha Servisu Edukasaun Munisipál iha oras servisu nian.
Iha parte seluk, Diretór Ensinu Báziku Sentrál (EBC-sigla portugés) 10 Dezembru Comoro, Nicolau Amaral, hateten ninia parte simu ona kaderneta eskolár foun ne’ebé maka atribui ona hosi Ministériu Edukasaun nune’e bele distribui ba EBC 10 Dezembru rasik ho ninia eskola filiál tolu tan.
“Ita simu ona kaderneta eskolár ba terseiru siklu Ensinu Báziku Sentrál 10 de Dezembro nian horiseik hamutuk 300, agora ba Ensinu Báziku Filial Bebonuk mak 95, Ensinu Filial Aimutin nian 193 no Ensinu Báziku Hudi Laran 95,” nia relata.
Notísia Relevante :Estudante 18.799 iha Liquiçá simu kaderneta eskolár foun
Jornalista : Osória Marques
Editór : Agapito dos Santos
