iklan

HEADLINE, SAÚDE

MS fó konsulta nehan gratuita iha ámbitu selebrasaun loron mundiál saúde orál

MS fó konsulta nehan gratuita iha ámbitu selebrasaun loron mundiál saúde orál

Estudante UNDIL Departamentu Dentaria fó konsulta nehan ba labarik, iha Timor Plaza, sábadu (16/03/2024). Imajen Tatoli/Natalino Costa

DILI, 16 marsu 2024 (TATOLI)Ministériu Saúde (MS) tinan ne’e selebra loron mundiál saúde orál ho atividade fó konsulta nehan ba labarik no ema boot sira, halo ezaminasaun nehan no ibun inklui enkoraja komunidade atu kuidadu saúde.

Tema ba selebrasaun loron mundiál saúde orál tinan ne’e mak ‘kose nehan loron-ida dala-rua ba hamnasa boot no kontente.’

Ofisiál Programa Saúde Orál MS, Vitorino Araújo, hateten, ministériu kolabora ho Unilever no Universidade Dili (UNDIL) Departamentu Dentaria hodi promove saúde orál liuhosi vizitante sira ne’ebé vizita Timor Plaza atu tau importánsia ba ibun no nehan sai saudavél liután.

“Atividade ohin nu’udar loron mundiál orál ho konsultasaun saúde nehan no liuhosi biban ne’e ami mós enkoraja komunidade sira tau importánsia a’as ba nehan nian,” Vitorino Araújo, fó hanoin iha ámbitu selebrasaun loron mundiál saúde orál iha Timor Plaza, sábadu ne’e.

Eventu saúde mundiál orál ba tinan ne’e sei realiza dala-rua, ida iha Dili Timor Plaza no eventu boot sei hala’o iha munisípiu Ataúro, ne’ebé sei fó konsulta boot nehan ba komunidade hotu iha Ataúro, iha loron sesta (23/03).

Notísia relevante : Ai-rin konstrusaun pediatria andar lima hanehan traballadór Xineza lakon vida

Iha fatin hanesan, Xefe Departamentu Dentaria UNDIL, Maria de Fátima Carvalho, informa, MS konvida Departamentu Dentaria UNDIL partisipa iha selebrasaun loron mundiál saúde orál tinan ne’e iha Timor Plaza hodi fó konsulta nehan ba komunidade no fó hanoin atu kuidadu saúde  nehan, liu-liu kuidadu nehan ho di’ak hosi moras perigu sira.

“Ministeriu Saúde konvida ami hodi partisipa iha selebrasaun loron mundiál saúde orál tanba UNDIL mak iha departamentu espesífiku kona-ba dentaria nian. Nune’e, atividade ohin iha fatin ida (Timor Plaza) ita fó tratamentu ba labarik sira kona-ba konsulta nehan ho gratuita inklui ba ema-boot sira ne’ebé hakarak halo konsulta nehan. Ami mós fó hanoin ba ita-nia komunidade kona-ba oinsá kuidadu nehan ho di’ak,” nia tenik.

Jornalista     : Natalino Costa

Editora          : Julia Chatarina

iklan
iklan

Leave a Reply

iklan
error: Content is protected !!