Alunu 1,289 ho sala de aula 6 obriga prosesu aprendizajen loron ida dala tolu
DILI, 17 marsu 2024 (TATOLI) – Ho númeru estudante aas, no sala de aula limitada obriga prosesu aprendizajen loron ida dala tolu iha Ensino Báziku Sentral Licapat (EBC Licapat), Postu Administrativu Hatulia B, Munisípu Ermera.
Preokupasaun ne’e hato’o husi manorin na’in Saturnina Diana Soares iha nia kanaar fatin EBC Licapat.
“Total estudante iha EBC Licapat hamutuk 1289. Ne’ebé, loron ida ita tenke tama dala tolu. Primeiru Siklu tama husi tuku 8.00 to10.15 dader, Segundu Siklu tama husi 10.15 to 01.00 lorokraik, no Terseiru Siklu tama husi 01.00 to 05.15 lorokraik,” Diana ba Tatoli.
Diana argumenta katak loron ida tama dala-tolu susar ba manorin sira atu halo hotu matéria ba periódu ida nian: “Ita tama oras rua de’it konserteza ita labele halo hotu matéria. Entaun, ninia implikasaun mak ita labele kobre kapítulu hotu tanba tuir kriteria edukasaun, ita tenke tama oras lima.”
“Situasaun ne’e difisil ba ita atu garante kualidade aprendizajen tanba sala ida akumula alunu 80 to 100. Ne’ebé, estudante sira tuur iha oin mak apriende ho di’ak. Ekuantu, sira tuur iha kotuk ita kolia sira la rona. Ezemlu, estudante balun to’o ona terseira klase maibé lee mos seidauk hatene,” tenik Diana.
Nia salienta EBC Licapat laiha tempu ba rekreiu: “Ami uza tempu rekreiu nian ba merenda eskolár. Ne’ebé, bainhira hahan tasak, alunu sira ba han no han hotu tama kedas aula.”
“EBC Licapat lá’os deit menus sala de aula, maibé mos materiál eskolár seluk hanesan meja no kadeira no profesor,” nia akresenta.
Total profesor ne’ebé hanorin iha EBC Licapat hamutuk 24, kompostu husi manorin permanente na’in-24 no voluntáriu na’in ne’en (6).
Diana informa katak EBC Licapat hato’o ona pedidu ba Edukasaun Munisípu no ba mos Nasional, maibé seidauk hetan resposta husi parte relevante, liuliu Ministériu Edukasaun.
“Ami hakarak husu ba Governu, liuliu Ministériu Edukasaun atu ajuda ami aumenta tan ami-nia sala de aula. Se aumenta tan sala ne’en (6) entaun sufisiente ona ba ami hodi tama dala-rua deit – dader no lorokraik,” profesora ne’e apela.
Jornalista Tatoli koko konfirma asuntu refere ho Diretór Edukasaun Munisípiu Ermera maibé nia laiha fatin.
Jornalista: Afonso do Rosario
Editór: Filomeno Martins
