ERMERA, 17 marsu 2024 (TATOLI) – Administrador Postu Administrativu Hatulia B, Sertório dos Santos Madeira hato’o katak durante tinan primeiru husi ninia mandatu, nia sei foku ba dezenvolvimentu estrade rural ligasaun entre aldeia, suku no postu no estabelese postu iha aldeia ne’ebé dook husi postu saúde.
Nia dehan orsamentu ba programa dezenvolvimentu estrada rurál bele mai husi Programa Nasional Dezenvolvimentu Suku (PNDS) no Programa Dezenvolvimentu Integradu ba Munisípiu (PDIM): “Atu dehan de’it katak iha estrada rurál balun mak halo husi orsamentu PNDS no PDIM.”
“Reprezentante suku sira hato’o ona sira nia prioridade. Ezemplu, husi suku Licapa nia proposta mak atu hadia estrada ligasaun entre suku ba aldeia. Suku Urahou hadia estrada ligasaun suku ba aldeia. Fatubessi aprezenta proposta hadia estrada husi Fatubessi Vila ba aldeia Asulau. Suku Fatubolu hadia Estrada husi Dauhati to Aldeia Poerema no Apirado. Husi suku lima iha Postu Hatulia B ne’e, so suku Mau-Ubu de’it mak aprezenta ona proposta konaba dada bee-moos,” Sertório ba Tatoli iha nia knaar fatin, Hatulia B.
Bainhira husu konaba projetu estrada rural PNDS ne’ebé mak kualidade ladi’ak, Sertório subliña katak nia sei tun ho nia ekipa hodi halo observasaun direta iha terenu: “Hau foin mak simu pose fulan ida ho balu tanba ne’e seidauk halo audit ba projetu hirak ne’ebé agora dadauk lao hela iha Hatolia B.”
“Há’u ho ekipa PNDS sei tun direta ba observa prosesu konstrusaun estrada ne’ebé liga entre postu administrativu ba suku sira hodi hatene obra hirak ne’e kualidade ka la’e,” nia realsa.
Atu assegura kualidade konstrusaun estrada hirak ne’e, administradór ne’e hatete “presija koolaborasaun entre PNDS ho servisu administrasaun postu atu nune’e bele follow up hela de’it servisu ne’ebé ekipa PNDS halo iha baze.”
Iha sorin seluk, Líder lokal ne’e mos kompromete sei kopera ho ministériu relevante hodi hari postu saúde iha aldeia ne’ebé mak dook husi Sentru Saúde Komunitaria Martinho Da Silva Guisarudu, Postu Administrativu Hatulia B.
Nia informa katak iha aldeia rua iha postu refere mak dook husi sentru saúde – Aldeia Asulau no Aldeia Lebumeo.
Sertório kompromete sei tau esforsu hodi hari postu saúde iha aldeira rua ne’e: “Aldeia rua ne’e iha tempu udan difísil ba sira atu asesu ba sentru saúde.”
Administradór foun ba suku lima ne’e simu posse iha 05 fevereiru tinan ne’e.
Jornalista: Afonso do Rosario
Editór: Filomeno Martins
