DILI, 18 marsu 2024 (TATOLI)—Autoridade munisípiu Dili daudaun ne’e hasoru difikuldade menus transporte hodi transporta lixu ba ninia fatin.
“Problema lixu iha Dili sai problema boot. Problema ida-ne’e ami identifika iha difikuldade transportasaun tanba ita iha de’it kamioneta hosi kompañia sira-nian hamutuk 50 mak loron-loron raut foer iha kapitál, entaun la kobre hotu lixu no dalaruma lixu aumenta,” Prezidente Autoridade Munisipiu (PAM) Dili, Gregório Saldanha, hateten, bainhira partisipa lansamentu ofisiál ba prosesu rekrutamentu pesoál servisu administrativu apoiu suku, iha salaun postu administrativu Metinaro, segunda ne’e.
Autoridade munisipál buka ona solusaun hodi haruka karta ba Primeiru-Ministru tanba orsamentu ba jestaun lixu ho montante millaun $7 haruka fali ba Konselu Administrasaun Fundu Infraestrutura.
“Ami husu ba Ministériu Planeamentu Investimentu Estratéjiku (MPIE) bele haree lalais situasaun ne’e atu ita aumenta viatura ba raut foer nian. Situasaun ne’e mak la rezolve lalais bele provoka kontestasaun barak iha públiku tanba sira iha direitu atu moris moos maibé mós iha obrigasaun atu hamoos,” nia akresenta.
Notísia relevante : AMD kontrata empreza China Harbour koloka kaixote lixu 7.000 iha Dili
Aleinde ne’e, Autoridade munisípiu Dili iha ona planu atu kria ekipa taskforce ida atu identifika problema no buka solusaun.
“Tinan ne’e tenke rezolve probelma lixu, tuir lema Dili hakmatek, furak, no moos, nune’e ha’u apela ba autoridade lokál sira atu apoiu malu atu ida-idak identifika problema lixu nian iha adeia no suku hodi buka solusaun,” nia tenik.
Gregório Saldanha sujere, Autoridade lokál sira serbisu hamutuk ho komunidade hodi haree kestaun lixu, tau iha nia fatin, haree dalan halo limpeza jerál no evita komunidade labele harii instalasaun komersiál ruma iha valeta leten nune’e bee halai tuir dalan no bainhira udan labele hamosu inundasaun.
Antes ne’e, Governu hamosu medida adekuadu kona-ba depozisaun reziduu sólidu iha Dili hamutuk 237 pontu kolesaun lixu, edifikasaun temporáriu hodi fasilita komunidade soe fo’er no iha kontentór hamutuk 212 koloka hodi fasilita komunidade soe lixu.
Sidadaun iha sidade Dili hamutuk 300.000 resin, kada loron prodús lixu tonelada 220, ne’ebé tama ba lixeiru Tibar 55%, enkuantu tama iha esgotu no tama taxi laran 45%.
Kada populasaun prodús 0,80%-0.85% lixu kada loron, nune’e hosi populasaun millaun 1,3 resin iha territóriu tomak prodús lixu tonelada 930 kada loron.
Jornalista : Arminda Fonseca
Editora : Julia Chatarina
