iklan

HEADLINE, KAPITÁL

MAE loke prosesu rekrutamentu pesoál servisu administrativu apoia suku

MAE loke prosesu rekrutamentu pesoál servisu administrativu apoia suku

Vise-Ministru Administrasaun Estatal, Jacinto Rigoberto de Deus. Imajen Tatoli/Francisco Sony

DILI, 18 marsu 2024 (TATOLI)—Ministériu Administrasaun Estatál (MAE), segunda ne’e, loke prosesu rekrutamentu pesoál ba servisu administrativu apoiu suku hamutuk 452 iha Timor-Leste.

Vise-Ministru Administrasaun Estatál, Jacinto Rigoberto Gomes de Deus, hateten, rekrutamentu ne’e bazeia lejizlasaun, ne’ebé eleisaun suku dahuluk ho durasaun tinan-hitu iha tinan 2016.

“Lei ida-ne’e sei nafatin hela, maibé hafoin haree ba esperénsia tinan-hitu xefe suku anteriór sira hasoru difikuldade, maka IX Governu Konstitusional kria tan dekretu-lei númeru 81/2023, 11 outubru atu reforsa mákina suku, kompostu hosi pozisaun haat hanesan sekretáriu administrasaun suku, ofisiál finansa, ofisiál administrasaun no ofisiál asuntu sosiál suku nian,” Vise-Ministru relata iha salaun postu administrativu Metinaro.

Vaga rekrutamentu sei fó sai hahú loron 19 marsu 2024 to’o 01 abríl 2024 iha postu administrativu sira, ne’ebé pesoál rekrutadu sira hahú serbisu iha maiu.

Ekipa juri ne’e rasik hosi iha postu administrativu sira, ne’ebé inklui Administradór postu administrativu rasik.

“Rekrutamentu ne’e rasik ema tenke mai hosi suku ne’e nia oan rasik, sei la foti hosi suku seluk fali, nune’e nia rasik dezenvolve nia suku hodi kontribui ba dezenvolvimentu nasaun nian, inklui prosesu ida-ne’e mós hola parte ona ba preparasaun ba dezentralizasaun poder lokál nian,” nia dehan.

Notísia relevante : Autoridade RAEOA prioriza asuntu estabelesimentu suku foun iha Oé-Cusse

MAE sei fó kapasitasaun ba pesoál sira ne’e hotu bainhira rekrutamentu hotu no sei destaka ba suku hafoin haree fasilidade serbisu.

Vaga ho pozisaun ofisiál administrasaun suku ba kategória pesoál servisu administrasaun suku, kria bazeia ba dekretu-lei númeru 81/2023, 11 outubru, ho totál vaga ida, lokál serbisu iha sede suku, saláriu mensál $150 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele estensaun bainhira iha avaliasaun pozitiva.

Pozisaun ofisiál finansa suku kategória pesoál servisu administrasaun suku, kria bazeia ba dekretu-lei númeru 81/2023, 11 outubru, totál vaga ida, lokál serbisu iha sede suku, saláriu mensal $150 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele estensaun bainhira iha avaliasaun pozitiva.

Ba pozisaun sekretáriu administrasaun suku, kategória pesoál servisu administrasaun suku, kria bazeia ba dekretu-lei númeru 81/2023, 11 outubru, totál vaga ida, saláriu mensál $170 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele estensaun bainhira iha avaliasaun pozitiva.

Pozisaun ofisiál asuntu sosiál suku nian, kategória pesoál servisu administrasaun suku, kria bazeia ba dekretu-lei númeru 81/2023, 11 outubru, totál vaga ida, saláriu mensál $150 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele extensaun bainhira iha avaliasaun pozitiva.

Iha fatin hanesan, Prezidente Autoridade Munisípiu Dili, Gregório Saldanha, konsidera rekrutamentu pesoál apoiu administrasaun suku ne’e importante tebes tanba atu reforsa administrasaun nível suku sir,  liu-liu parte Dili nian.

“Reforsa administrasaun suku importante tebes tanba sei iha pesoa na’in-haat apoiu xefe suku sira-nia serbisu, ne’ebé pesoál hirak ne’e ba ida-idak nia serbisu rasik, hanesan sekretáriu, finansa, administrasaun no asuntu sosiál nian. Espera ho sira-nia prezensa bele hakma’an servisu Governu nian hahú hosi kraik,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!