iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

MSSI lansa pagamentu pensaun sosiál ba benefisiáriu 280 iha suku Lalisuk

MSSI lansa pagamentu pensaun sosiál ba benefisiáriu 280 iha suku Lalisuk

MSSI lansa pagamentu pensaun sosiál ba benefisiáriu 280 iha suku Lalisuk. Imajen mídia Gabinete RAEOA.

OÉ-CUSSE, 18 marsu 2024 (TATOLI) –  Ministra Solidariédade Sosiál no Inkluzaun (MSSI), Verónica das Dores, hamutuk ho Prezidente Autoridade Rejiaun Administrativa Espsiál Oé-Cusse Ambeno (RAEOA), Rogério Tiago Lobato, segunda ne’e lansa pagamentu pensaun sosiál no ema ho defisiénsia faze dahuluk ba benefisiáriu 280 iha suku Lalisuk sub-rejiaun Pante Makasar.

Notísia relevante: MSSI sei halo lansamentu pagamentu ba pensaun sosiál iha RAEOA

Governante ne’e konfirma, polítika IX Governu Konstitusionál, lideradu Primeiru Kay Rala Xanana Gusmão, konsidera ferik no katuas idade liu 60 ba leten, nu’udar erois vivus, nune’e Governu deside aumenta pensaun sosiál hosi idade 60-69 simu $60 kada fulan,  idade 70-79 simu $80 kada fulan no idade 80 ba leten simu $100 kada fulan.

Tanba ne’e, atu simu pensaun hirak-ne’e, Institutu Nasionál Seguransa Sosiál (INSS) halo pagamentu ba benefisiáriu sira ho maneira rua, primeiru liuhosi Automated Teller Machine (ATM) P24 bele simu kada fulan, no sira-ne’ebé hela iha área rurál seidauk iha konta bankária no ATM simu kada fulan tolu iha tinan ida nian.

“Tanba ita-nia eroi sira mate ba rai ne’e sira lakohi-tán dala-ida atu halo terus tán ita-nia ferik katuas sira, tanba ne’e maka ita-nia Maun Boot (Xanana) bolu apá amá sira, erois vivus, asuwain sira-ne’ebé moris, tanba sira maka lori pregu hodi determina nasaun ne’e nia futuru, tan ne’e ita hakarak erois vivus sira-ne’e bele goza netik ukun rasik-an ne’e, no  ita-nia apa no ama sira-nia osan agora sa’e,” dehan Verónica das Dores, iha suku Lalisuk.

Ministra Solidariedade Sosiál no Inkluzaun (MSSI), husu ba benefisiáriu sira, osan ne’ebé Governu apoia, uza atu goza direitu hodi hola hahán no labele uza ba lia.

“Ha’u husu, imi mak uza, labele fó fali ba bei-oan sira, ne’e uza ba imi presiza rasik, tanba ne’e imi-nia direitu tomak, labele halo lia, no labele sosa fali karau hodi halo ba lia, ne’e labele, maibé tenke hola buat ruma, nune’e imi haan-hemu, hodi goza imi-nia direitu bainhira ita sei moris ho idade hanesan ne’e,” Ministra Verónica das Dores, ko’alia iha ámbitu lansamentu ne’e.

Notísia relevante: MSSI koordena asuntu tolu inklui pensaun sosiál ho Autoridade RAEOA

Prezidente Autoridade RAEOA, Rogério Tiago Lobato, agradese ba banku Banku Nasionál Comersiu Timor-Leste (BNCTL), tanba  kria banku movél hodi atende benefisiáriu sira-ne’ebé la konsege asesu pagamentu públiku.

“Atu halo pagamentu ba idozu sira, liuhosi sistema ida, osan ne’ebé sira simu kompletu laiha koa, tanba problema ne’ebé uluk ita enfrenta maka idozu sira, hela iha suku aldeia, atu mai simu sira-nia osan iha Pante Makasar, tenke gasta osan selu transporte, maibé inisiativa di’ak hosi banku BNCTL mai buka atu lori pagamentu no sira-ne’ebé labele simu, iha banku movél sei ba to’o fatin hela bá,”  nia katak.

Benefisiáriu Alarico Pui, agradese ba Governu Timor-Leste, tanba kada tinan aumenta pensaun sosiál, nune’e bele kontinua goza direitu nu’udar ferik katuas hodi hatutan moris loron loron nian.

“Ohin loron ami  hasoru ho nai ulun sira, hosi nasionál no RAEOA, hanoin netik ami, ba osan ami-nia hanoin ne’e agradese tanba tempu hahú simu de’it $30, maibé depois sa’e tán ba $52, no agora sa’e tán ba $60, to’o $100,” nia agradese.

Notísia relevante: MSSI husu benefisiáriu pensaun sosiál hakbesik autoridade lokál hodi konfirma dokumentu

Entretantu, total benefisiáriu pensaun sosiál iha Rejiaun Oé-Cusse hamutuk 7043, mai hosi sub-rejiaun haat hanesan, ub-rejiaun Pante Makasar hamutuk 3.312, komposta suku ulau (8), hanesan suku Lalisuk 280, Cunha 450, Bobokase 178, Naimeko 465, Taiboko 697, Lifau 257, Costa 745 no suku Nípani 150.

Iha sub-rejiaun Nítibe hamutuk 1.417  komposta hosi suku lima (5), hanesan suku Suni-Ufe 180, Bene-Ufe 255, Usitaco 349,  Lela-Ufe 385 no suku Ban-Afi 248.

Iha sub-rejiaun Oésilo hamutuk 1.570, komposta hosi suku tolu (3) hanesan suku Bobometo 926,  Usitasa’e 511 no suku Usitaqueno 133.

Nune’e mós iha sub-rejiaun Pássabe hamutuk 744, komposta hosi suku rua (2), hanesan suku Abani 585 no suku Malelat 159.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!