BOBONARO, 18 marsu 2024 (TATOLI)-Muzeu Memoriál Munisipál Bobonaro, hahú hosi tinan 2023 to’o agora rekolla ona narrativu funu hosi sobrevivente na’in-11, hosi númeru ne’e na’in-ualu halo ona prezervasaun iha muzeu refere.
“Narrativu ne’ebé ami entrevista sobrevivente sira iha tinan kotuk na’in-ualu no tinan ne’e hahú hosi janeiru to’o marsu na’in-lima, inklui Prezidente Autoridade Munisipál Bobonaro sesante, narrativu ne’ebé ami foti hamutuk 11,” Koordenadora Muzeu Memoriál Munisipál Bobonaro, Marciana Gouveia Leite, ko’alia iha Maliana.
Alende narrativu, Muzeum Memoriál Munisipál Bobonaro mos rekolla ona objetu rua; sanan no tudik ne’ebé kontribui ba funu libertasaun nasionál 1975-1999.
Objetu hirak-ne’e rekolla hosi sobrevivente sira-ne’ebé hela iha postu administrativu Maliana.
“Sira uza sanan ne’e ba te’in, iha tempu sira halo gerilleiru iha ai-laran no tudik ne’e sira uza salva guarda ba sira-nia aan,” nia katak.
Jestora ne’e hatutan, atividade entrevista sobrevivente sira daudaun ne’e sei foka iha kapitál Maliana, tanba kestaun klima, maibé tuir planu sei realiza iha postu administrativu lima seluk.
Koordenadora ne’e dehan, iha komemorasaun loron veteranu 03 marsu ba dala-VII, ekipa Muzeu Memoriál Munisipál Bobonaro fahe ona brosura ba veteranu sira no fahe ona informasaun liuhosi Facebook kona-bá atividade ne’e sei hala’o iha tinan ne’e.
” Sobrevivente sira agora daudaun prepara-aan atu mai fó sira-nia narrativu iha muzeu ida-ne’e,” nia katak.
Muzeum refere estabelese hosi Sentru Nasionál Chega, Institutu Públiku (CHEGA,I.P) ho objetivu atu prezerva dokumentu istóriku períodu 1974-1999 no fasilita informasaun kona-bá istória pasadu ba publiku.
Notísia relevante: Muzeu Bobonaro sei implementa atvidade tolu iha 2024
Jornalista: Sérgio da Cruz
Editór: Evaristo Soares Martins
