BOBONARO, 19 janeiru 2024 (TATOLI)-Muzeu Memoriál Munisipál Bobonaro, liderada Koordenadora Marciana Gouveia Leite, sei implementa atividade importante tolu iha tinan 2024,nhodi prezerva istória pasadu no materiál funu ne’ebé funu na’in sira uza halo funu hahú 1974-1999.
Atvidade ne’e sei implementa mak hanesan entrevista sobrevivente sira iha postu administrativu neen, rekolla dokumentu no materiál ne’ebé kontribui ba prosesu luta libertasaun nasionál no bolu estudante sira mai lee istória funu pasadu ne’ebé prezerva iha muzeumñ ne’e.
Koordenadora Marciana Gouveia Leite, hatutan foin lalais ne’e halo ona entrevista ba sobrevivente na’in-ualu no rekolla ona materiál sira hanesan fotografia masakre Polres Maliana nia ida inklui xanan ida-ne’ebé funu-nain sira uza iha pasadu.
Notísia relevante: Governu inaugura Muzeu Memoriál Munisipál Bobonaro
“Atividade 2024 nia ami sei kontinua prezerva istoria pasadu, maibé tuir ami-nia planu ne’ebé trasa ona, ami sei entrevista sobrevivente sira iha postu-postu,”bnia informa ba Jornalista sira iha kna’ar fatin, Maliana, sesta ne’e.
Jestora Muzeu Munisipál ne’e fundamenta, molok halo atvidade entrevista sobrevivente sira, sei halo uluk koordenasaun ho autoridade lokál no administradór postu sira.
Parte Muzeu mos sei servisu hamutuk ho Konsellu Kombatente Libertasaun Munisipál Bobonaro hodi fornese dadus kombatente.
“Agora tanba klima ami seidauk, depois la udan ona mak ami foin ba entrevista, tanba buat ida ita entrevista ema ne’e la fasil, hanesan buat ida karik ita ba sukit fali sira-nia kanek, entaun ami kuidadu oinsá atu hasoru sobrevivente sira, tanba ema iha bainhira hatuur nia istória la fasil atu ita atu entrevista sira,” nia katak.
Jestora Muzeum refere apela ba komunidade no veteranu ho veterana sira atu idak-idak loke fuan, neon no laran hodi konta fila-fali pasadu.
“Ita-nia istória ne’e la’ós hela de’it mai ita, oinsá ita atu rai hela ba jerasaun foun sira, tanba bainhira ita ukun-aan la’ós surat-tahan ida karik, ema tau iha bandeza entrega mai ita ukun-aan, entaun ho ida-ne’e ami presiza ita-boot sira-nia istória atu prezerva iha museu,;nune’e ita-nia bei-oan sira vizita muzeu, sirabele hatene istória,” nia katak.
Enkuantu dezde estabelesimentu no inaugurasaun muzeu refere iha 28 novembru 2023,biha komunidade, profesór no sobrevivente na’in-15 mak vizita ona hodi haree kondisaun no lee istória sira-ne’ebé prezerva iha muzeu ne’e.
Notísis Relevante: Estadu kondekora kombatente no mártir 201 iha Bobonaro
Jornalista: Sérgio da Cruz
Editór: Evaristo Soares Martins
