DILI, 19 marsu 2024 (TATOLI) Ministériu Edukasaun (ME) legaliza ona diploma sekundáriu jerál no tékniku vokasionál nian iha territóriu nasionál ne’e hamutuk 2.881-resin no hosi dadus ne’e Eskola Ensinu Tékniku Vokasionál hamutuk 221 no Eskola Ensinu Sekundáriu Jerál ne’e hamutuk 2.660.
“Dadus ema-ne’ebé mak mai legaliza sira-nia diploma hamutuk 2.660, dadus ida-ne’e hahú husi fulan-setembru 2023 to’o mai agora,” Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes, hateten ba Agência Tatoli iha nia kna´ar fatin, Vila verde, segunda ne’e.
Hosi númeru ne’e, nia dehan, loron ida simu ema entre 600 to’o 700 ne’e iha ema balun ba hala´o ona sira-nia estudu iha rai-liur no mós ema balun atu buka servisu iha rai-laran.
“Ita legaliza ne’e depende situasaun de’it. Ezemplu, hanesan foin daudaun loke rekrutamentu polísia nian ne’e inklui bolsa rekrutamentu ka kandidau ba profesór nian ne’e, loron ida dala ruma atende ema 600 ou bele to’o 700. Depende ba situasaun de’it bainhira iha terrenu ne’e presiza. Loron baibain ne’e atende de’it 100 no menus husi ema na’in-100 mós,” nia dehan.
Diretór Nasionál Sekundáriu Tékniku Vokasionál, Fernando Mouzinho Gama, hateten iha territóriu Timor-Leste ne’e dirasaun Sekundáriu Tékniku Vokasionál legaliza hamutuk 221, no ida-ne’e ba estudante sira-ne’ebé mak hela iha Dili maibé iha munisipiu iha dadus ketak tanba la’ós mai hotu lagaliza iha Dili.
“Hosi janeiru to’o fevereiru, ita legaliza ona ema nia-diploma hamutuk 221. Kada loron, ita simu ema entre 20 to’o 30,” nia dehan.
Jornalista : Osória Marques
Editór : Cancio Ximenes
