DILI, 19 marsu 2024 (TATOLI)–Primeiru-Ministru (PM), Kay Rala Xanana Gusmão, tersa ne’e, hala’o enkontru ho Embaixadór Tailándia ba Timor-Leste, Atipat Rojamapaibulya, hodi diskute kona-ba kooperasaun bilaterál ne’ebé rai rua estabelese ona.
Tailándia sei kontinua ajuda kapasitasaun rekursu umanu iha setór saúde no kria mata-dalan kona-ba kuidadu saúde inan no oan inklui apoiu seluk tan.
“Enkontru ho Primeiru-Ministru, ami diskute kona-ba kooperasaun bilaterál entre Timor-Leste no Tailándia, ne’ebé Primeiru-Ministru mensiona esperiénsia kona-ba memória furak forsa Tailándia hola parte iha misaun pás Organizasaun Nasaun Unida (ONU) iha tinan 2002. Ida-ne’e hanesan kooperasaun ida importante ba dezenvolvimentu rai rua apoia nafatin Timor-Leste iha área importante sira no adezaun Timor-Leste atu sai membru ASEAN,” Embaixadór Atipat Rojamapaibulya hafoin reuniaun ho PM Xanana, iha Palásiu Governu, tersa ne’e.
Notísia relevante : Embaixadór Tailándia entrega karta kredensiál ba Xefe Estadu
Tailándia sei apoia mós revizaun ba kuríkulu hodi dezenvolve rekursu umanu ba asuntu kuidadu saúde labarik tuir esperiénsia.
Durante enkontru, Embaixadór konvida Xefe Governu Xanana atu hala’o vizita ba Tailándia hodi fahe esperiénsia kona-ba indústria kafé ba foin-sa’e no setór privadu sira.
Tailándia, liuhosi nia kooperasaun téknika, Ajénsia Kooperasaun Internasionál Taiáandia (TICA) sempre apoia Governu no sosiedade Timor iha área oin-oin.
PM Xanana hato’o agradese ba apoiu hirak ne’e no Governu kontinua koordena nafatin ho liña ministériu sira hodi kontaktu ho Embaixada Tailándia bele serbisu hamutuk implementa kooperasaun hirak ne’ebé deskute.
Timor-Leste no Tailándia antes ne’e estabelese relasaun diplomátika iha outubru 2002, hafoin nasaun ne’e restaura independénsia no Governu Tailándia haruka ninia forsa partisipa iha misaun manutensaun pás ONU durante administrasaun tranzitória.
Jornalista : Antónia Gusmão
Editora : Julia Chatarina
