iklan

NASIONÁL, EKONOMIA, HEADLINE

DJJPE planeia halo leilaun aiteka hun rihun-tolu iha Suai

DJJPE planeia halo leilaun aiteka hun rihun-tolu iha Suai

Jornalista Agência Tatoli, Antónia Gusmão halo entrevista ho Diretora Nasionál Inventáriu no Jestaun Bens no Móvel MF, Timotea Marques, iha ninia knaar fatin Balide, kuarta (20/03/2024). Imajen Tatoli/António Daciparu

DILI, 20 marsu 2024 (TATOLI)–Ministériu Finansa (MF) liuhosi Diresaun Jerál Jestaun Patrimóniu Estadu (DJJPE) planeia halo leilaun aiteka ne’ebé pertense ba Governu.

Diretora Nasionál Inventáriu no Jestaun Bens no Móvel MF, Timotea Marques, dehan, razaun Governu hakarak halo leilaun tanba haree aiteka sira ne’e iha valór ekonómiku.

“Ami planeia ona atu halo leilaun ba aiteka sira ne’ebé afetadu hosi projetu Suai supply base, tanba projetu ne’e atu hahú ona. Ai sira ne’e Governu halo tiha ona indemnizasaun ba populasaun sira ne’ebé na’in ba ai sira ne’e, ne’ebé pertense ona ba Governu,” Timotea Marques, hateten ba Agência Tatoli, iha ninia knaar fatin Balide, kuarta ne’e.

Notísia relevante : Komandu PNTL sei halo leilaun ba viatura 163

DJJPE koordena ho parte Floresta no Timor GAP molok atu halo leilaun ba públiku.

“Públiku sira ne’ebé interrese bele sosa aiteka hamutuk hun rihun tolu, ne’ebé okupa iha rai hektare 414, lokaliza iha área Samfu, postu administrativu Suai, munisípiu Covalima,” nia akresenta.

DJJPE planeia ona iha tersa (26/03) sei realiza reuniaun komisaun hamutuk ho ekipa Floresta no Timor GAP hodi deside bainhira prontu maka foin fó sai avizu.

“Sei fó tempu loron-lima para rekerente ne’ebé interrese bele ba haree direta ai sira ne’e hodi kompete. Valór seidauk deside tanba sei iha reuniaun komisaun maibé tanba hakarak lalais dalaruma modalidade ne’ebé ami hakarak aplika ho maneira leilaun hasta públiku, katak hiit liman de’it, ne’ebé sé mak interrese konvida sira mai hiit liman de’it,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!