DILI, 20 marsu 2024 (TATOLI)–Konsellu Ministru (KM) aprova ona projetu proposta lei ba alterasaun datoluk lei númeru 3/2006, loron 12 abríl, kona-ba estatutu kombatente libertasaun nasionál, ne’ebé aprezenta husi Ministru Asuntu Kombatente Libertasaun Nasionál, Gil da Costa Monteiro ‘Oan Soru’.
“Objetivu husi proposta lei ida-ne’e maka atu promove rekoñesimentu ofisiál ba veteranu no kombatente libertasaun nasionál, liuhosi atribui kondekorasaun no aktu rekoñesimentu sira seluk ba ema sira-ne’ebé luta ba país ne’e durante períodu perturbadu luta ba independénsia no soberania nasionál, liliu hosi tinan 1975 to’o 1978, ne’ebé korresponde ba períodu Baze Apoiu nian,” Vise-Ministru Asuntu Parlamentár, Adérito Hugo da Costa, relata hafoin reuniaun ezekutivu, iha Palásiu Governu, kuarta ne’e.
Notísia relevante : MAKLN seidauk fó sai lista validasaun veteranu rejistradu 2009
Aleinde ne’e, diploma ne’e atu korrije lakuna iha lejizlasaun atuál kona-ba atribuisaun pensaun ba família martir libertasaun pátria nomós rezolve problema sira iha implementasaun pensaun pekuniária únika no altera estrutura reprezentativa kombatente libertasaun nasionál nian hodi kontribui ba armonia sosiál no estabilidade polítika nasionál.
Jornalista : Antónia Gusmão
Editora : Julia Chatarina
