iklan

NASIONÁL, DEFEZA, HEADLINE

KM altera estatutu militár hodi valoriza kontribuisaun veteranu

KM altera estatutu militár hodi valoriza kontribuisaun veteranu

Vise-Ministru Asuntu Parlamentu, Adérito Hugo da Costa. Imajen Tatoli/ Egas Cristóvão.

DILI, 20 marsu 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova projetu dekretu-lei kona-ba alterasaun dahuluk ba dekretu-lei númeru 33/2020 loron 02 setembru, kona-ba estatutu militár FALINTIL-Forsa Defeza Timor-Leste (F-FDTL), ne’ebé aprezenta hosi Ministru Defeza, Donaciano do Rosário Gomes.

Vise-Ministru Asuntu Parlamentár, Adérito Hugo da Costa, hateten, atu atinje objetivu sira-ne’ebé trasa ona, importante tebes maka kontinua dezenvolve medida no implementasaun sira-ne’ebé lori ba prosesu reforma ne’ebé justu no dignu ba militár veteranu ativu iha serbisu.

“Ho hanoin ida-ne’e, Governu hakarak elimina restrisaun ne’ebé antes ne’e impoin ba militár sira-ne’ebé ho idade reforma iha tinan 60 hodi labele ezerse tan funsaun militár. Tanba ne’e, intervensaun lejizlativu ida-ne’e ho objetivu atu asegura katak militár veteranu sira, hafoin reforma, karik sira hakarak kontinua halo funsaun militár la operasionál ba períodu determinadu,” Vise-Ministru Asuntu Parlamentár relata hafoin reuniaun ezekutivu, iha Palásiu Governu, kuarta ne’e.

Funsaun sira-ne’e inklui kargu administrativu apoiu sosiál militár, atividade kona-ba ensinu no formasaun, peskiza, dezenvolvimentu no inovasaun, aleinde área sira seluk ne’ebé prezerva istória militár Timor-Leste nian.

Notísia relevante : Ministériu Defeza konklui dekretu lei estatutu militár

Medida ida-ne’e ho objetivu atu asegura katak legadu hosi militár veteranu sira transmite valór sira hanesan patriotizmu, korajen no sakrifísiu ba jerasaun aban bain-rua nian.

Projetu dekretu-lei ne’e promove mós alterasaun ba durasaun kargu Xefe Estadu-Maiór Jenerál Forsa Armada (CEMGFA, sigla portugés) no Vise-CEMGFA, ne’ebé limita mandatu durante tinan-tolu, ho posibilidade halo renovasaun ba tinan-rua tan, tuir proposta ne’ebé aprova husi Konsellu Superiór Defeza Militár nian.

“Ho alterasaun ida-ne’e, hirak ne’ebé hala’o besik tinan-haat hafoin implementasaun estatutu militár F-FDTL nian ne’ebé hakarak atu valoriza kontribuisaun militár veteranu sira-ne’ebé reforma no estabelese prazu foun ba kargu lideransa militár nian,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!