DILI, 20 marsu 2024 (TATOLI)—Reprezentante povu iha Parlamentu Nasionál (PN) liuhosi Deputadu FRETILIN, Antoninho Doutel Sarmento, husu Governu liuhuosi Ministériu Justisa (MJ) presiza fó atensaun kona-ba atribuisaun sidadania ba ema estranjeiru ne’ebé hela kle´ur ona iha Timor-Leste.
Notísia Relevante: Sidadaun estranjeiru atu hetan nasionalidade Timor tenke halo rekerimentu ba MJ
“Hanoin Governu tenke fó mós nasionalidade ba ita-nia maluk sira hosi Indonézia hela iha Timor-Leste ne’e durante tempu okupasaun Indonézia. Ha´u levanta kestaun ida-ne’e, tanba haree ba realidade iha semana kotuk ha´u la´o hosi Fatuberliu hetan malu ho maluk Indonézia barak mak hela iha postu Fatuberliu, munisípiu Manufahi. Sira mai hosi Indonézia dezde okupasaun Indonézia hamutuk hela ho ita komesa iha tinan 1992 to’o agora, sira seidauk hetan nia nasionalidade. Entaun, Governu liuhosi Ministériu Justisa bele orienta Dirasaun Nasionál Rejistu Notariadu atu bele foti dadus hodi bele fó ezame ba sira, nune´e sira bele hetan nasionalidade,” Deputadu ne’e hateten ba jornalista sira iha Parlamentu Nasionál.
Mezmu sira la hetan nasionalidade maibé durante ne´e sira iha ne’eba kontribui makaas kolabora ho autoridade lokál ba serbisu hotu hodi hadi´a Timor-Leste, maibé triste tanba la konsidera sira hodi fó nasionalidade ba sira to’o agora.
Tanba ne´e, nia husu husu Governu fó nasionalidade tuir Lei Nasionalidade nian númeru 9/2002, 05 novembru no dekretu-lei númeru 1/2004, 04 fevereiru kona-ba filiasaun, adosaun, kazamentu, naturalizasaun no funsaun boot no kna´ar importante sira, ho kriteira ne’ebé iha katak atu hetan sidadania timoroan ema estranjeiru ida tenke prienxe rekezitu sira mak hanesan kaben ho timoroan liu ona tinan lima no hela iha territóriu nasionál maizamenus tinan rua no hela fatin iha terrtióriu maizamenus tinan 10 to’o ko’alia lian ofisiál ida ho hatene istória no kultura Timor-Leste.
“Ami haree katak, rekezitu sira-ne’ebé iha sira prienxe ultrapasa ona, kestaun mak Governu liuhosi Ministériu Justisa bele orienta dirasaun nasionál rejistu notariadu atu bele foti dadus hodi bele fó ezame ba sira, nune´e sira bele hetan nasionalidade ne’ebé hanesan mós timoroan, ” nia hateten.
Vise Ministru ba asuntu Parlamentár, Adérito Hugo da Costa, rejista preokupasaun ne’e no sei enkamina ba ministériu tutela hodi bele tau atensaun.
Notísia Relevante: Ministru Cárceres prefere halo revizaun ba lei atribuisaun nasionalidade
Jornalista : Nelson de Sousa
Editór : Cancio Ximenes
