DILI, 21 marsu 2024 (TATOLI)-Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, husu ba sidadaun hotu atu kada ema ida kuda ai-oan ida hodi halo Timor sai nasaun ida matak.
“Hakarak apela ba sidadaun hotu-hotu iha obrigasaun hodi ema ida kuda ai ida, iha tinan ida ne’e no karik liu ne’e di’ak liután,” Assanami hato’o lia hirak ne’e bainhira Partisipa atividade kuda ai-oan hodi komemora Loron Mundiál Floresta iha, Tibar, Postu Administrativu Bazartete, Munisípiu Liquiça.
Loron Mundiál Floresta ne’ebé monu iha loron 21 fulan-Marsu tinan ida ne’e ho tema “Floresta no Inovasaun Solusaun Foun ba Mundu Ne’ebé Diak Liu.”
Relasiona ho atividade reflorestasaun ne’e, Vise-Primeiru Ministru, ne’ebé reprezenta Xefe Governu, hato’o ninia apresiasaun ba sosiedade tomak ne’ebé ohin komemora loron importante ne’e ho atividade kuda ai-oan.”
“Agradese no apresia ba servisu Guarda Floresta tomak ne’ebé sai guardiaun hodi kontrola parke nasionál no ai-laran tuan sira seluk hodi ema labele estraga ai sira”, Vise PM ne’e apresia.
Husu mós ba Ministériu Agrikultura, Pekuaária, Peska no Floresta (MAPPF), atu buka ai ne’ebé iha valór hodi kuda, nune’e bele fó matak ba ambiente hodi fó moris ba nia ema sira.
“Ohin Loron Mundiál Floresta no aban Loron Mundiál Bee, tanba ne’e husu ba Sekretáriu Estadu Floresta atu identifika espesie ai ne’ebé bele kuda besik iha bee-matan sira, nune’e ba oin bee labele maran”, nia sujere.
Notísia relevante: Selebrasaun Loron Internasionál Floresta ho kuda ai-oan 500 iha área João Paulo II
Jornalista: Hortencio Sanchez
Editór: Florencio Miranda Ximenes
