DILI, 21 Marsu 2024 (TATOLI) – Ministériu Agrikultura, Pekuária, Peska no Floresta (MAPPF) komemora, ohin, Loron Internasional Floresta, ne’ebé monu iha 21 Marsu, ho kuda ai-oan hamutuk 500 iha rai ektare lima, iha área João Paulo II, hodi prevene inundasaun iha fatin referida.
Sekretáriu Estadu Floresta, Fernandinho Vieira, hatete Timor-Leste foin ba dahuluk komemora loron ida-ne’e ho objetivu atu hasa’e koñesimentu no konxiénsia komunidade sira kona-ba importánsia floresta ba dezenvolvimentu nasaun Timór, nomós ba mundu.
Fernandinho Vieira hatutan ai-hun 500 ne’ebé maka ohin kuda ona iha foho-lolon ne’e kompostu husi ai-nimba, akásia, ai-camplo, ai-kakeu. Husi plantasaun sira ne’e kategoria ai-konservasaun hodi satan rai sira hodi labele monu no fó impaktu fali ba dezenvolvimentu estrada iha área João Paulo II nian.
MAPPF selebra Loron Internasional Floresta ho tema: Floresta no Inovasaun: solusaun foun ba mundu ida mellór hodi kuda ai-hun ida la’ós atu fó lukru ba komunidade sira, maibé sei fó benefísiu ba setór saúde, inklui fó enerjia no oksijen ba ema nia moris.
Iha fatin hanesan, Xefe Departamentu Guarda Florestál, Apolinário Freitas, dehan sira sei kontinua kontrola rai ektare lima iha área Joao Paulo ne’ebé kuda ona ai sira.
“Ita iha guarda florestál na’in-neen ne’ebé kontrola área protejida ektare lima. Ami mós hetan apoiu husi eskritóriu guarda sira husi sentrál sira. Ami mós kontinua fó advokasia ba komunidade hodi labele estraga ai-laran, liuhusi tesi ai ilegál”, dehan.
Rekorde katak Asembleia Jerál Nasaun Unida proklama loron 21 Marsu hanesan Loron Internasionál Floresta, iha 2012. Loron ida ne’e ho objetivu mak aumenta konxiénsia sobre importánsia husi tipu floresta hotu.
Notísia relevante: Floresta alerta ba populasaun labele tesi ai iha fatin risku ba inundasaun
Jornalista: Tomé Amado
Editora: Maria Auxiliadora
