DILI, 21 marsu 2024 (TATOLI) – Primeiru-Ministru, Kay Rala Xanana Gusmão hala’o enkontru semenál ho Prezidente Repúblika, José Ramos Horta, hodi informa kona-ba inisiativa Governu liuhosi Ministériu Juventude, Desporta, Arte no Kultura (MJDAK hodi loke kompetisaun ba Grupu Arte Marsiál (GAM) hodi bele promove sira nia talentu no kreatividade iha área desportu.
“Molok atu realiza eventu hira ne’e, Governu sei suspende nafatin atividade GAM nian hodi observa, bainhira grupu sira ne’e la komete krime asalta malu, posibilidade atividade kompetisaun ba GAM bele hala’o iha fulan novembru tinan ne’e,” PM Xanana katak ba jornalista sira iha Palásiu Prezidensiál Dili, kinta ne’e.
Governu fó hatene ona ba Konsellu Reguladór Arte Marsiál (KRAM) atu hato’o ba GAM hotu atu santin pás iha nasaun ne’e.
“Bainhira lider arte marsiál sira la kontrola membru sira ho di’ak liuhosi Konsellu Ministru ami suspende nafatin ba fulan neen tan, atu nune’e líder arte marsiál hotu bele kontrola sira nia membru,” Xanana hatete.
Governu agradese no fó apresu boot tebes ba situasaun ida ne’ebé hakmatek hafoin suspensaun ba atividade (treinu) GAM nian foin lalais ne’e.
Iha enkontru ne’e lider rua deskute mós orientasaun Governu ba Komandu Polisia Nasionál Timor-Leste (PNTL) atu buka tuir oknum juventude sira ne’ebé lansa informasaun sadik malu atu baku malu liuhusi média sosiál no ka’er grupu juventude balun ne’ebé ataka malu iha Portu Dili oin.
“Ohin dader grupu arte marsiál balun ba iha Portu Dili ne’ebá Ró mai hosi Oe-Cusse mak sira ataka malu, maibé Polisia kaer ona sira,” nia dehan.
Nune’e, Xefe Governu alerta nafatin ba funsionáriu Estadu hanesan professór, membru PNTL, F-FDTL atu labele tama no envolve iha grupu arte marsiál hodi evita konflitu labele kontinua akontese iha Timor-Leste hodi kontribui harii pás.
Notísia relevante: SEJD admite hafoin reativa atividade arte-marsiál krime hahú menus
Jornalista: Hortencio Sanchez
Editór: Florencio Miranda Ximenes
