DILI, 21 marsu 2024 (TATOLI) – Tribunál Judisiál Primera Instánsia Dili, iha kuarta (21/3), liuhosi Juiz koletivu Alvaro Maria, José Gonsalves no Jumiati Freitas, Ministériu Públiku reprezenta husi Prokuradór Aderito Tilman halo inspesaun ba sela Komandu Polísia Nasionál Timor-Leste (PNTL) relativamente ba José Bernardo ne’ebé mate iha sela detensaun polisiál.
José Bernardo mate iha sela Komandu PNTL Munisípiu Dili tanba deskonfia tara-an iha 2022. Iha kazu ne’e membru PNTL na’in-tolu mak Ministériu Públiku konstitui hanesan arguidu.
Antes halo inspesaun, iha audiénsia ba julgamentu ohin, parte defeza ba arguidu sira, Defensór Públiku Estaqui Guterres solisita ba Tribunál liuhosi Juiz Koletivu ne’ebé ka’er kazu José Bernardo husu ba Tribunál atu halo inspensaun ba lokál krime liuliu sela detensaun Komandu PNTL Dili ne’ebé mak sai hanesan fatin ba detensaun ba José Bernardo to’o hakotu nia vida.
Nune’e mak Tribunál aseita pedidu solisitasaun hosi parte defeza nian no Tribunál ba halo kedan inspesaun ba lokáldukrime iha sela Komandu PNTL Munisípiu Dili.
Estaqui Guterres solisita ba Tribunál koletivu hodi halo inspesaun ba lokáldukrime nian. Tanba mosu pergunta barak no dúvida balun sei mosu, kona-ba fatin akontesimentu iha sela Komandu PNTL ne’ebé momentu ne’e sai fatin ba detensaun ba matebian José Bernardo.
“Perguntas balu mosu no iha dúvida uitoan kona-ba lokál ne’e, tanba ne’e maka defeza husu ba Tribunál hodi halo inspesaun ba lokáldukrime, atu Tribunál rasik mós bele hare loloos kona-ba lokáldukrime ne’e”, Estaqui Guterres dehan ba jornalista sira hafoin akompaña Tribunál halo inspesaun ba lokáldukrime iha sela Komandu PNTL Munisípiu Dili, kinta ne’e.
Tribunál no Prokuradór no mós defeza sira haree rasik kona-ba fatin akontesimentu no arguidu mós marka prezensa no parte sira husu kedan pergunta ba arguidu, hodi responde kona-ba dúvida ne’ebé Tribunál iha.
“Hosi inspesaun ne’e laos ikus ona, maibé atu reponde de’it dúvida balun no Tribunál sei marka fali loron balun hodi rona sasin sira”, nia konklui.
Notísia relevante : MP iha fulan ne’e konklui investigasaun ba kazu José Bernardo
MP prepara halo inkéritu ba kazu José Bernardo nia-mate
Jornalista: Natalino Costa
Editór : Zezito Silva
