iklan

JUSTISA, HEADLINE

MP prepara halo inkéritu ba kazu José Bernardo nia-mate

MP prepara halo inkéritu ba kazu José Bernardo nia-mate

Logotipu Ministériu Públiku (MP).

DILI, 13 setembru 2022 (TATOLI)— Prokuradór Jerál Repúblika (PJR), Alfonso Lopes, halo despaisu hodi delega kompeténsia ba Prokuradór Titulár, Jacinto Babo ho ekipa, atu halo inkéritu ba José Bernardo “Adriano” ne’ebé mate ho fiu eleirisidade iha kakorok, iha sela detensaun Komandu Polisia Nasionál Timor-Leste (PNTL) Munisípiu Díli.

Notísia relevante:  Kazu mate iha sela polísia, PNTL fó suspensaun preventiva ba membru na’in-ualu

“Kazu ne’e nia rezultadu investigasaun iha Ministériu Públiku (MP), nune’e, Prokuadór Jerál Repúblika (PJR), despaisa ona mai ha’u atu haree ba kazu ne’e. Tanba ne’e, hanesan Prokuradór titulár ba kazu ne’e, ha’u labele ko’alia buat ida liga ho kazu ne’e rasik, tanba ha’u mak titulár ba kazu no prosesu hotu hein iha faze inkéritu,” hateten Prokuradór Jacinto Babo ba Agência TATOLI via telefónika, tersa ne’e.

Prokuradór Titulár ne’e dehan daudaun ne’e Ministériu Públiku mós forma tan ekipa ida atu haree, akompaña no halo inkéritu ba José Bernardo nia-mate.

“Bainhira kazu ne’e akontese iha sela PNTL, ha’u rasik mós ba kedan fatin akontesimentu, nune’e deside Ministériu Públiku mós forma kedan ekipa hodi halo inkéritu,” katak.

Notísia relevante: Ekipa konjunta hahú rekolla evidénsia ba kazu joven ida mate iha sela detensaun polísia

Prokuradór Jacinto Babo akresenta, kazu ne’e parte MP seidauk bele halo inkéritu, tanba sei iha hela faze feriadu judisiáriu.

“Hafoin feriadu judisiáriu iha loron 16 setembru ne’e, mak Ministériu Públiku hahú loke halo inkéritua ba kazu ne’e,” nia afirma.

Daudaun ne’e, Prokuradór Jerál Repúblika (PJR), Alfanso Lopes, mós prepara ona relatóriu ba José Bernardo “Adriano” nia-mate, atu tempu badak nia-laran relata ba Prezidente Repúblika, José Ramos Horta.

Antes ne’e, PNTL detein matebian José Bernardo “Adriano” nu’udár suspeitu ba kazu konfrontu ida iha área Audian nian, tanba deskonfia envolve kazu agresaun fíziku hasoru vítima ne’ebé mós hakotu ona iis, foin lalais iha HNGV.

Maibé, iha loron kinta (01/09), José Bernardo mate iha sela detensaun komandu munisípiu Dili, Caicoli ho kondisaun fiu eletrisidade iha nia-kakorok.

Hafoin kazu ne’e, Komandu Jerál PNTL kria ekipa konjunta, kompostu hosi Ministériu Públiku (MP), Defensória Públika (DP), Provedória Direitu Umanu no Justisa (PDHJ, sigla portugés), Polísia Nasionál Servisu Investigasaun Kriminál (PNSIK) no parte Investigasaun Kriminál Munisípiu Dili, atu halo investigasaun, rekolla informasaun no evidénsia sira hodi submete rezultadu investigasaun ba MP.

Notísia Relevante: Rejeita mate tanba tara-aan, família matebian husu PNTL fó sai rezultadu autópsia

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!